قازاقستاندىقتاردىڭ جالاقىسى 10,5 پايىزعا ارتتى
ايتا كەتسەك، ەلىمىزدە ەڭ جوعارى جالاقىنى قارجىگەرلەر، ساقتاندىرۋ كومپانيالارىنىڭ قىزمەتكەرلەرى مەن عالىمدار الادى، دەپ حابارلايدى قازاقپارات ranking.kz سايتىنا سىلتەمە جاساپ.
2019 -جىلدىڭ 1 - توقسانىندا ءبىر جۇمىسشىنىڭ ورتاشا ايلىق جالاقىسى 168,5 مىڭ تەڭگەنى قۇرادى. بۇل رەتتەگى جىلدىق ءوسىم بىردەن 10,5 پايىزعا جەتىپ وتىر. سونىمەن قاتار قازاقستاندىقتاردىڭ جالاقىسىنىڭ ساتىپ الۋشىلىق قابىلەتىنىڭ شىنايى ءوسىمى ينفلياتسيانى ەسكەرگەندە 5,2 پايىزعا جەتتى. بۇل سوڭعى جىلدارداعى رەكوردتىق كورسەتكىش سانالادى. 2018 -جىلدىڭ ءدال وسىنداي كەزەڭىندە جالاقى ءبىر جىلدان ەكىنشى جىلعا قاراعاندا 8,7 پايىزعا ارتىپ، 152,4 مىڭ تەڭگەنى قۇراعان بولاتىن. ال ساتىپ الۋشىلىق قابىلەتتىڭ شىنايى ءوسىمى 2 پايىزعا تومەندەگەن ەدى.
وسى جىلدىڭ 1 - توقسانىندا ورتاشا ايلىق جالاقىنىڭ ەڭ جوعارى كورسەتكىشى وڭىرلىك شەكتە اتىراۋ وبلىسىندا تىركەلىپ، 322,7 مىڭ تەڭگە بولدى. ءبىر جىل بۇرىنعى كەزەڭمەن سالىستىرعاندا 15,2 پايىزعا ءوسىم بار. بۇل ورتاشا رەسپۋبليكالىق دەڭگەيدەن (168,5 مىڭ تەڭگە) 154,7 مىڭ تەڭگەگە جوعارى. جالاقى دەڭگەيى بويىنشا ەكىنشى ورىندا ماڭعىستاۋ وبلىسى تۇر. اتالعان وڭىردەگى ورتاشا ايلىق جالاقى 287,9 مىڭ تەڭگە، ءبىر جىل ىشىندەگى ءوسىم 2,1 پايىز. ايتا كەتەرلىگى، وسىدان ءبىر جىل بۇرىن بۇل ءوڭىر جالاقى دەڭگەيى بويىنشا كوش باستاپ تۇرعان بولاتىن.
ۇزدىك ۇشتىك قاتارىندا نۇر- سۇلتان قالاسى دا بار. ەلورداداعى ورتاشا جالاقى جىلدىق 4,4 پايىز وسىممەن 233,5 مىڭ تەڭگەگە جەتىپ وتىر.
ەڭ تومەنگى جالاقى تۇركىستان وبلىسىندا تىركەلگەن. وڭىردەگى جالاقى 109 مىڭ تەڭگەنى قۇرايدى. بۇل رەسپۋبليكا بويىنشا ورتاشا كورسەتكىشتەن 1,5 ەسە از.
ەلىمىزدە ەڭ جوعارى جالاقىنى قارجى جانە ساقتاندىرۋ سالاسىنىڭ قىزمەتكەرلەرى الادى. ولاردىڭ ايلىق تابىسى 323 مىڭ تەڭگەنى قۇرايدى، جىلدىق ءوسىمى - 8,1 پايىز. ەكىنشى ورىندا - كاسىبي، عىلىمي جانە تەحنيكالىق سالا ماماندارى. ولاردىڭ جالاقىسى جىلدان- جىلعا قاراعاندا 16,2 پايىزعا ارتىپ، 296,3 مىڭ تەڭگەگە جەتىپ وتىر. اقپارات جانە بايلانىس سالاسىنىڭ ورتاشا جالاقىسى دا 16,1 پايىزعا ءوسىپ، 253 مىڭ تەڭگەنى قۇراعان.
اۋىل، ورمان جانە بالىق شارۋاشىلىعى جۇمىسشىلارىنىڭ جالاقىسى ەڭ جوعارى (16,4 پايىز) ءوسىم كورسەتكەنىمەن، بۇل سالاداعى ايلىق نەبارى 93,2 مىڭ تەڭگەنى قۇرايدى. دەنساۋلىق ساقتاۋ، الەۋمەتتىك قىزمەتتەر (115,8 مىڭ تەڭگە) جانە ءبىلىم بەرۋ (109,9 مىڭ تەڭگە) ماماندارىنىڭ دا جالاقىسى ەڭ تومەن بولىپ وتىر.