مويىنقۇمدا 10 كۇن بويى شاحتادا التىن قازعاندار 3 قاپ رۋدانى ۇرلاۋ ۇستىندە ۇستالدى
بۇل تۋرالى پوليتسيا بولىمىنە وسى كاسىپورىننىڭ قىزمەتكەرلەرى حابارلادى. جابىرلەنۋشى تاراپتىڭ ايتۋىنشا، بەلگىسىز تۇلعالار كومپانيانىڭ كۇزەتىلەتىن اۋماعىنا كىرىپ، تەرەڭدىگى 100 مەتر شاحتاعا ءتۇسىپ، قۇرامىندا التىن بار 3 قاپ كەن ۇرلاماق بولعان. مويىنقۇم اۋدانىنىڭ پوليتسيا قىزمەتكەرلەرى وسى قىلمىسقا قاتىسى بار دەگەن كۇدىكپەن 1976-جانە 1977 -جىلى تۋعان ەكى ەر ادامدى ۇستادى. كۇدىكتىلەر اقمولا وبلىسى مەن نۇر- سۇلتان قالاسىنىڭ تۇرعىندارى بولىپ شىقتى
تەرگەۋ بارىسىندا ءۇش ەر ادام الدىن الا ءسوز بايلاسىپ، 26- مامىردان باستاپ قۇرال- سايمان مەن ازىق- تۇلىك الىپ، قىمبات مەتالدى ءوندىرۋ ءۇشىن شاحتاعا تۇسكەنى انىقتالدى. كۇدىكتىلەر شاحتادا 10 كۇننەن استام ۋاقىتتا بولعان. ولار كەندى قاپقا جيناپ قويعانىمەن، قىلمىستى اياقتاي الماعان. كەنشىلەر بۇزاقىلاردى قىلمىس ورنىندا ۇستادى.
اتالعان دەرەككە قاتىستى ق ر قىلمىستىق كودەكسىنىڭ 24-بابى 3-بولىگى، 188-بابى 3-بولىگى بويىنشا سوتقا دەيىنگى تەرگەۋ امالدارى باستالدى. زاتتاي ايعاقتار الىندى. ءبىرقاتار قاجەتتى ساراپتامالار تاعايىندالعان. قازىرگى ۋاقىتتا پوليتسيا قىزمەتكەرلەرى ءۇشىنشى سىبايلاسىن ىزدەستىرىپ جاتىر.
