تۇيەقۇستىڭ ءبىر جۇمىرتقاسىمەن 10-12 ادامدى تويدىرۋعا بولادى - تۇركىستاندىق زەينەتكەر

تۇركىستان. قازاقپارات - وتىرار اۋدانىنىڭ تۇرعىنى ءالزاق ەرىمبەتوۆ ەكى جىلدان بەرى تۇيەقۇس ءوسىرۋ ىسىمەن اينالىسىپ كەلەدى. 65 جاستاعى زەينەتكەر ءۇشىن بۇل كۇندەلىكتى ۇيرەنشىكتى كاسىپكە اينالىپ كەتكەن، دەپ حابارلايدى قازاقپارات ءتىلشىسى.

وتىرارلىق ەرىمبەتوۆتەر شاڭىراعىن جەرلەستەرى «زووپاركى بار ءۇي» اتاپ كەتكەن. سەبەبى، مۇندا قازىر افريكالىق قۇستار وسىرىلەدى. اۋلادا قاز، ۇيرەك، قىرعاۋىل، بودەنە، كەكىلىك، توتىقۇس تا بولعان. ءتىپتى، ءۇي يەلەرى سۇلۋلىقتىڭ سيمۆولى - اققۋدى دا اسىراپتى. دەگەنمەن، قولعا ۇيرەنبەگەن دالا قۇسى كوپ ءومىر سۇرە الماعان.

«اققۋدى 6 ايداي اسىرادىق. قولدان كولشىك جاساپ قويعانبىز. دەگەنمەن، جەرسىنبەدى. 50-گە جۋىق تاۋىعىمىز بولدى. ونىڭ ىشىندە بىرنەشە ءتۇرىن وسىردىك. جۇمىستقاسىن ساتىپ، كاسىبىمىزدى كەڭەيتتىك. قورا سالدىق. تۇيەقۇستاردى سول كاسىپتەن تۇسكەن قارجىعا ساتىپ الدىق»، - دەيدى اقساقال.

بۇگىندە ەرىمبەتوۆتەر اۋلاسىندا 8 تۇيەقۇس بار. ونىڭ تورتەۋى افريكالىق، تورتەۋى اۆستراليالىق تۇرىنەن الىنعان. ولاردىڭ وزىندىك ەرەكشەلىكتەرى دە كوپ. ماسەلەن، افريكالىق تۇيەقۇستار ءىرى بولىپ كەلەدى. بويى 2,8-3 مەترگە دەيىن جەتەدى. ال، اۆستراليالىقتاردىڭ بويى - 1-1,5 مەتر. جۇمىرتاسى دا كىشكەنتاي.

«افريكالىق 4 بالاپاننىڭ ءارقايسىسىن 100 مىڭ تەڭگەدەن، اۆستراليالىق بالاپانداردى 70 مىڭنان ساتىپ العان بولاتىنمىن. بۇگىندە سول بالاپانداردى كوبەيتىپ، جەمىسىن كورىپ وتىرمىن. ال، قازىر بىرەۋى 1 ميلليون تەڭگەنىڭ جوباسىندا باعالانادى»، - دەيدى ءالزاق ەرىمبەتوۆ.

قاريانىڭ ايتۋىنشا، تۇيەقۇس وسىرۋدەن تۇسەتىن پايدا كوپ. ونىڭ تەرىسى، تۇياعى، تۇمسىعى، اسىرەسە ەتى نارىقتا زور سۇرانىسقا يە. ويتكەنى، ەتىنىڭ قۇرامىندا ماي مەن حولوستەرين از بولعاندىقتان، وتە ءوتىمدى. بويى 2-3 مەتر كەلەتىن اتالىعى 100-150 ك گ دەيىن ەت بەرسە، سالماعى 3-3,5 ك گ كەلەتىن جۇمىرتقاسىنىڭ بىرەۋىن قۋىرىپ، 10-12 ادامدى تاماقتاندىرۋعا بولادى. ءبىر ماۋسىمدا 120 جۇمىرتقا تاباتىن تۇيەقۇستار نەگىزىنەن جەم- شوپپەن قورەكتەنەدى. كۇتىمى جاقسى بولسا 80-100 جىل ءومىر سۇرەدى.

«تۇيەقۇستارعا ارناپ ۇزىندىعى 50 مەتر بولاتىن قورا سالدىق. سەبەبى، ولار كۇنىنە 70 شاقىرىم ءجۇرۋى كەرەك. جەم- ءشوپ جەپ العان سوڭ، ىشىندە جۇگىرەدى، ارى- بەرى جۇرەدى. كىشكەنتاي كەزىندە نەمەرەلەرىم ۇستىنە شىعىپ الىپ، ات ەتىپ مىنەتىن. قازىر ءوستى. اساۋ، اناۋ- مىناۋعا كونبەيدى. جۇمىستقاسىن ارنايى ۇزىن تاقتايمەن تارتىپ الامىز»، - دەيدى شارۋا.

سونداي- اق، قاريانىڭ اۋلاسىندا 7 پاۆلين بار. ولاردىڭ دا كۇتىمىن اقساقالدىڭ ءوزى جاسايدى. جەمىن، سۋىن بەرىپ، جۇمىرتقاسىن جيناپ الادى.

«پاۆليننىڭ ءبىر جۇمىتقاسى 5 مىڭ تەڭگە تۇرادى. قۇستىڭ ءبىر جۇبى 150000 تەڭگەگە باعالانادى. كوپشىلىك «باقىت قۇسى» دەپ اتايدى عوي. سوندىقتان، ءوسىرىپ كەلەمىز»، - دەيدى ول.

كاسىپكەر قاريانىڭ كەي ىستەرىنە ۇلى جانۇزاق كومەكتەسەدى. ال، ۇلى جۇمىسقا كەتكەن ساتىندە بارشا شارۋاشىلىققا اتايدىڭ ءوزى باس كوز بولىپ قالادى.

ءبىر كەرەمەتى، شارۋانىڭ اۋلاسىنداعى قورا- قوپسى اۆتوماتتاندىرىلعان. قۇستاردى سۋارۋ ءۇشىن ءبىر تەتىكتى باسۋ جەتىپ جاتىر. جەم- ءشوپ دايىنداۋ ىسىندە دە جاڭا تەحنولوگيالار قولدانىلادى. ءشوپ الدىن الا اپپاراتپەن تۋرالىپ، قۇستاردىڭ الدىنا جەتكىزىلەدى. فيزيكالىق كۇش جۇمساۋدىڭ كوپ قاجەتتىلىگى دە جوق.

«جالپى، قۇس شارۋاشىلىعىمەن 2015 -جىلدان باستاپ اينالىسا باستادىم. ال، تۇيەقۇس ءوسىرۋدى قولعا العانىما 3 جىل بولدى. ودان بولەك، ينكۋباتورلار ارقىلى بالاپان اشتىرىپ، ساتامىز. ەندى دالادان قورا سالاتىن جەر كورىپ ءجۇرمىن. سەبەبى، تۇيەقۇستاردى كوبەيتەيىن دەسەم اۋلاداعى قوراما سىيمايدى»، - دەيدى اقساقال.

بۇگىندە وتىرار اۋدانىنىڭ ورتالىعى، ءشاۋىلدىر اۋىلىندا ورنالاسقان شاعىن شارۋاشىلىققا قىزىعۋشىلىق تانىتىپ، كورىپ كەتەتىندەر كوپ. ءتىپتى، جەرلەستەرى ۇيىنە كەلگەن قوناقتارىن ەرتىپ كەلىپ، تۇيەقۇستاردى تاماشالايدى. مۇندايدا ءالزاق اقساقالدىڭ ەسىگى ءاردايىم اشىق.

اۆتور

قايرات زاينيشيەۆ