17:40, 25 - قاڭتار 2023 | GMT +5
تارازدا جاڭا تۋعان ءسابيدى 1,5 ميلليون تەڭگەگە ساتقان اكۋشەرلەر قاماۋعا الىندى
تاراز. قازاقپارات - جامبىل وبلىسىندا جاڭا تۋعان ءسابيدى ساتۋ فاكتىسىنىڭ جولى كەسىلدى، دەپ حابارلايدى قازاقپارات وبلىستىق پروكۋراتۋراعا سىلتەمە جاساپ.
تاراز قالاسىنىڭ پروكۋراتۋراسى جانە جامبىل وبلىسى پ د ۇيىمداسقان قىلمىسقا قارسى ءىس-قيمىل باسقارماسىمەن بىرلەسىپ جەدەل ىزدەستىرۋ شارالارىن جۇرگىزدى.
سونىڭ ناتيجەسىندە جاڭا تۋعان ءسابيدى ساتۋ فاكتىسى انىقتالدى.
بيىلعى 12- قاڭتار كۇنى اتالعان دەرەك بويىنشا ق ر ق ك 135-بابىنىڭ 1-بولىگىمەن سوتقا دەيىنگى تەرگەۋ باستالعان. ونىڭ بارىسىندا 39 جاستاعى ايەلدىڭ جاڭا تۋعان قىز بالانى اكۋشەردەن 1,5 ميلليون تەڭگەگە ساتىپ العانى اشكەرە بولعان.
قازىر تاراز قالالىق كوپبەيىندى اۋرۋحاناسىنىڭ 2 مەديتسينالىق قىزمەتكەرى ۇستالدى.
اتالعان تۇلعالار ق ر ق پ ك 128-بابىمەن ۋاقىتشا ۇستاۋ يزولياتورىنا قاماققا الىندى.
اتالعان قىلمىستىق ءىستىڭ تەرگەلۋ بارىسى قالا پروكۋراتۋراسىنىڭ باقىلاۋىنا الىنعان.
