بىلىمگە سالىنعان ينۆەستيتسيا 1,5 ەسە ءوستى

استانا. قازاقپارات - بيىل قاڭتار-قىركۇيەكتە ءبىلىم سالاسىنىڭ نەگىزگى كاپيتالىنا سالىنعان ينۆەستيتسيا 219,1 ميلليارد تەڭگەگە جەتتى. بۇل وتكەن جىلمەن سالىستىرعاندا اقشالاي تۇردە 49,2 پايىزعا كوپ، دەپ حابارلايدى قازاقپارات ءتىلشىسى.

Finprom مالىمەتىنشە، وڭىرلەر اراسىندا ينۆەستيتسيانىڭ ەڭ كوپ كولەمى ادەتتەگىدەي الماتىعا ءتۇستى - 61,7 ميلليارد تەڭگە. جىلدىق ءوسىم 2,3 ەسەگە جەتىپ وتىر.

سونىمەن قاتار ۇزدىك ۇشتىككە تۇركىستان وبلىسى (33,9 ميلليارد تەڭگە) مەن شىمكەنت قالاسى (22,3 ميلليارد تەڭگە) كىرەدى.

اتالعان ءۇش ايماققا ەلىمىزدە ءبىلىم سالاسىنا سالىنعان ينۆەستيتسيانىڭ 53,8 پايىزى تيەسىلى.

ەڭ تومەنگى كورسەتكىش ۇلىتاۋ وبلىسىندا تىركەلىپ وتىر. نە ءبارى - 337,7 ميلليون تەڭگە. قاراعاندى مەن اقتوبە وبلىستارىنا دا ينۆەستيتسيا از سالىنعان.

ءبىلىم بەرۋگە سالىنعان كۇردەلى سالىمداردىڭ ۇشتەن ەكىسى دەرلىك جەرگىلىكتى بيۋجەت ەسەبىنەن قامتاماسىز ەتىلدى - 136,5 ميلليارد تەڭگە. بۇل ءبىر جىل بۇرىنعىدان 64,9 پايىزعا ارتىق.

سالاعا كاسىپورىنداردىڭ مەنشىكتى قاراجاتى ەسەبىنەن 51,6 ميلليارد تەڭگە، رەسپۋبليكالىق بيۋجەت قاراجاتىنان 21,8 ميلليارد تەڭگە، بانك نەسيەسىنەن 6,5 ميلليارد تەڭگە، بانكتىك ەمەس قارىزداردان 2,8 ميلليارد تەڭگە سالىنعان.