تۇركىستان وبلىسىندا 1 مەكتەپتە 42 ەگىز بالا وقيدى
ارىس قالاسىنىڭ ءا. جانگەلدين اتىنداعى 32№ جالپى ورتا مەكتەبىندە 42 ەگىز بالا ءبىلىم الادى. 21 جۇپتىڭ ىشىندە ەكى ەگىز وقۋشى ءبىرىنشى سىنىپتىڭ تابالدىرىعىنان اتتاپ وتىر. ال، وتكەن جىلعى وقۋ جىلىندا ءبىر ەگىز مەكتەپ بىتىرگەن. ءبىر قىزىعى ەگىزدەر تەك ءۇشىنشى سىنىپتا عانا جوق. قالعان 0-11 ارالىعىنداعى سىنىپتىڭ بارلىعىندا بار.
«ءبىزدىڭ مەكتەپتى كوپشىلىك ەگىزدەر وقيتىن ءبىلىم ورداسى دەپ بىلەدى. ەگىزدەردىڭ ساباق ۇلگەرىمى ءار ءتۇرلى. اراسىندا ۇزدىك وقيتىندارى كوپ. ال، كوپشىلىگىنىڭ دەڭگەيى ورتاشا. دەگەنمەن، بارشاسىنىڭ ساباققا دەگەن ىنتالارى جوعارى»، - دەيدى مەكتەپ ديرەكتورى راحيما ءجۇنىسوۆا.
ءبىلىم ورداسىندا وقيتىن ەگىزدەر ىشىندە ءبىر ۇيدەن ءۇش جۇپ بار. ماسەلەن، تايش وتباسىنىڭ اقنۇر مەن ءبيبىنۇر ەسىمدى قىزدارى مەكتەپكە دەيىنگى دايارلىق توبىندا ءبىلىم السا، بەسىنشى سىنىپتا سارا مەن سالمان ەسىمدى جەتكىنشەكتەرى بار. ال، ميراس پەن دياس ەسىمدى بالالارى جەتىنشى سىنىپقا بارىپ ءجۇر.
«ەگىزدەردى اجىراتۋ قيىن ەمەس. بارشاسىنىڭ وزىندىك بەلگىلەرى بار. ماسەلەن، ءبىر جۇپتاعى ۇلكەنىنىڭ بويى ۇزىن بولسا، ەكىنشىسى الاسا كەلەدى»، - دەيدى راحيما ءجۇنىسوۆا.
ايتا كەتەيىك، ءا. جانگەلدين مەكتەبى 1993-جىلى سالىنعان. بۇگىندە مەكتەپتە 1660 بالا ءبىلىم الادى. وقۋشىلارعا 155 پەداگوگ ساباق بەرەدى.
