ا. مىرزاحمەتوۆ: جەكە قوسالقى شارۋاشىلىقتارى ءسۇت زاۋىتتارىنا 1,3 ميلليون توننادان استام ءسۇت جەتكىزۋگە دايىن

استانا. قازاقپارات - ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ اتىراۋ وبلىسى اۋىل شارۋاشىلىعىنىڭ اعىمداعى جاعدايى جانە دامۋ پەرسپەكتيۆالارى ماسەلەلەرى بويىنشا وتكەن كەڭەستە ەلىمىزدىڭ جەكە قوسالقى شارۋاشىلىقتارى (ج ق ش) الەۋەتىن اڭگىمەلەدى.

«جۇمىس ىستەپ تۇرعان ءسۇت زاۋىتتارىنىڭ جۇكتەمەلىگى %64 قۇرايدى. قولدانىستاعى قۋاتتىلىقتارى قوسىمشا 680 مىڭ توننا ءسۇت وندەۋگە مۇمكىندىگى بار. ءبىزدىڭ ەسەبىمىز بويىنشا بۇگىندە ج ق ش ءسۇت زاۋىتتارىنا 1,3 ميلليون توننادان استام ءسۇت جەتكىزۋگە دايىن»، - دەپ اتاپ ءوتتى ول.

«قۋاتتىلىقتارىن جۇكتەۋگە مۇمكىن بولاتىن ءسۇت كولەمدەرىن انىقتاۋ ماقساتىندا ءبىز جۇمىس ىستەپ تۇرعان ءسۇت وندەۋشى كاسىپورىندارمەن ساۋالناما جۇرگىزدىك. 152 كاسىپورىن ىشىنەن 93 كاسىپورىن ج ق ش- نان 380 مىڭ توننا كولەمىندە ءسۇت ساتىپ الۋعا دايىن. 59 كاسىپورىن تازا شيكىزات ساتىپ الۋعا قىزىعۋشىلىق تانىتپادى، سەبەبى ولاردىڭ ءوندىرىسى قۇرعاق ءسۇت پايدالانۋعا نەگىزدەلگەن»، - دەپ ويىن تولىقتىردى مينيستر.

ايتا كەتەيىك، بۇگىن ا. ي. مىرزاحمەتوۆ جۇمىس ساپارىمەن اتىراۋ وبلىسىنا كەلگەن بولاتىن. مۇنىڭ الدىندا ءمينيستردىڭ توراعالىعىمەن ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە جەر رەفورماسى بويىنشا كوميسسيا مۇشەلەرىنىڭ اتىراۋ وبلىسى حالقىمەن كەزدەسۋى بولىپ ءوتتى.