فيليپپين پرەزيدەنتى 1,2 ميلليون دوللاردىڭ كولىكتەرىن تاپتاتىپ تاستادى

استانا. قازاقپارات - فيليپپين پرەزيدەنتى رودريگو دۋتەرتە جەمقورلىقپەن كۇرەس ماقساتىندا ەلگە زاڭسىز كىرگىزىلگەن ونداعان ليۋكس ساناتىنداعى اۆتوموبيلدەردى بۋلدوزەرمەن تاپتاتىپ تاستادى، دەپ حابارلايدى Reuters.

جالپى قۇنى 1,2 ميلليون دوللاردى قۇرايتىن بارلىعى 20 كولىك جويىلعان، كەيبىرەۋىنىڭ قۇنى 100 مىڭ دوللاردان اسادى.

مەملەكەت باسشىسى جەمقورلىق قىلمىسپەن كۇرەستىڭ وسىنداي جولىن تاڭداعان. «شەنۋنىكتەر ونداي كولىككە مىنبەۋى كەرەك، ماشينالاردى مەتالعا وتكىزىپ، ويىنشىق جاساپ شىعارىڭدار»، - دەگەن مالىمدەمە جاسادى دۋتەرتە.