شىمكەنت مەكتەبى 1 باسكەتبول دوبىن 232 مىڭ تەڭگەگە ساتىپ الماق بولعان

شىمكەنت. قازاقپارات - سىبايلاس جەمقورلىققا قارسى ءىس- قيمىل اگەنتتىگى شىمكەنت قالاسى بويىنشا دەپارتامەنتى 2,2 ميلليون تەڭگەدەن استام بيۋدجەت قاراجاتىن ءتيىمسىز پايدالانۋدىڭ الدىن الدى، دەپ حابارلايدى قازاقپارات ءتىلشىسى.

قالالىق ءبىلىم باسقارماسىنا قاراستى «№90 دارىندى بالالارعا ارنالعان مامانداندىرىلعان مەكتەپ- گيمنازياسى» ك م م مەملەكەتتىك ساتىپ الۋ جوسپارىندا 2,7 ميلليون تەڭگەگە 20 دوپ الۋدى بەكىتكەن. مەملەكەتتىك مەكەمە باسكەتبول دوبىن 232 مىڭ تەڭگەگە، ال ۆولەيبول دوبىن 42 مىڭ تەڭگەگە ساتىپ الۋدى جوسپارلاعان. «تاۋاردىڭ ءاربىر بىرلىگى 2-دەن 10 ەسەگە دەيىن اسىرا باعالانىپ ەسەپتەلگەن.

دەپارتامەنت مەملەكەتتىك ساتىپ الۋدى ۇيىمداستىرۋشىنىڭ اتىنا جوسپاردىڭ تارماعىن قايتا قاراۋ تۋرالى ۇسىنىسحات جولدادى. ناتيجەسىندە 2,2 ميلليون تەڭگەدەن استام قارجى ۇنەمدەلدى»، - دەپ جازدى سىبايلاس جەمقورلىققا قارسى ءىس- قيمىل اگەنتتىگى شىمكەنت قالاسى بويىنشا دەپارتامەنتىنىڭ باسشىسى داۋرەن ەرعارين Facebook-تەگى جەكە پاراقشاسىندا.