قازاقستان تاجىكستانعا 1 گەكتار جەردى 1 تەڭگەگە جالعا بەرەدى
مۇنداي شەشىم بۇگىن ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا قابىلداندى، دەپ حابارلايدى قازاقپارات.
وتىرىستا «قازاقستان مەن تاجىكستان ۇكىمەتتەرى اراسىندا ديپلوماتيالىق وكىلدىكتەردىڭ عيماراتتارىن سالۋ ءۇشىن جەر ۋچاسكەلەرىن ءوزارا بەرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن ق ر سىرتقى ىستەر ءمينيسترىنىڭ ورىنباسارى ەرجان اشىقبايەۆ تانىستىردى.
«قازاقستان مەن تاجىكستان اراسىنداعى قارىم-قاتىناستار ەكى ەل تاۋەلسىزدىك العان ساتتەن باستاپ دوستىق ءارى ستراگيالىق ارىپتەستىك رۋحىندا دامۋدا. جوعارى دەڭگەيدەگى كەزدەسۋلەر، ءتۇرلى حالىقارالىق الاڭداردى قوسا العاندا تۇراقتى تۇردە وتكىزىلۋدە. 2018-جىلعى 14- ناۋرىزداعى تاجىكستان پرەزيدەنتى ەمومالي راحموننىڭ قازاقستانعا ساپارى ەكىجاقتى ارەكەتتەسۋدى جانداندىرۋدا ساپالى قادام بولدى»، - دەدى ول.
ونىڭ ايتۋىنشا، قازاقستان مەن تاجىكستان ۇكىمەتتەرى اراسىنداعى ديپلوماتيالىق وكىلدىكتەردىڭ عيماراتتارىن سالۋ جەر تەلىمدەرىن ءوزارا بەرۋ تۋرالى كەلىسىمگە تاجىكستان سىرتقى ىستەر ءمينيسترى زاريفيدىڭ 2010-جىلعى 24- تامىزداعى رەسمي ساپارى بارىسىندا استانا قالاسىندا قول قويىلعان.
«بۇل كەلىسىم - ەكى ەلدە ديپلوماتيالىق وكىلدىكتەردىڭ بولۋى جانە جۇمىس ىستەۋ جاعدايلارىن قامتاماسىز ەتەتىن ماڭىزدى قۇجات. كەلىسىمگە سايكەس، تاجىك تاراپى قازاقستاندىق تاراپقا قازاقستان ەلشىلىگىنىڭ عيماراتىن سالۋ ءۇشىن دۋشانبە قالاسىنداعى سوموني داڭعىلى ءبىرىنشى ديپلوماتيالىق قالاشىقتاعى جالپى الاڭى 1 گەكتار جەر ۋچاسكەسىن بەرەتىن بولادى. جالعا بەرۋ مەرزىمى 49 جىلدى قۇرايدى جانە جىلىنا 1 سوموني مولشەرىندە جالداۋ اقىسى تولەنەدى. ءوز كەزەڭىندە قازاقستان تەپە-تەڭدىك نەگىزىندە تاجىك تاراپىنا استانادا ش. قالداياقوۆ كوشەسىنىڭ وڭتۇستىگىندە ورنالاسقان جالپى الاڭى ءبىر گەكتار جەر تەلىمىن بەرەدى. جالعا بەرۋ مەرزىمى 49 جىلدى قۇرايدى جانە جىلدىق اقىسى 1 تەڭگە»، - دەدى سىرتقى ىستەر ءمينيسترىنىڭ ورىنباسارى.
ەرجان اشىقبايەۆتىڭ ايتۋىنشا، كەلىسىمنىڭ ءۇشىنشى بابىنا سايكەس، جەر ۋچاسكەلەرى بورىشتاردان، اۋىرتپالىقتاردان جانە ءۇشىنشى تۇلعالاردىڭ قۇقىقتارىنان بوس تۇردە بەرىلەدى. كەلىسىم 49 جىل بويى قولدانىستا بولادى. ەگەر تاراپتاردىڭ ءبىرى ديپلوماتيالىق ارنالار ارقىلى ەكىنشى تاراپتىڭ ونىڭ قولدانىسىن ۇزارتپاي نيەتى تۋرالى اعىمداعى 49 جىلدىق كەزەڭ اياقتالعانعا دەيىن كەمىندە 1 جىل بۇرىن حاباردار ەتپەسە كەلەسى 49 جىلدىق كەزەڭگە اۆتوماتتى تۇردە ۇزارتىلادى. ق ر جەر كودەكسى 6- بابىنىڭ 7- تارماقشاسىنا سايكەس باسقا مەملەكەتتەردىڭ قازاقستان اۋماعىنداعى جەر پايدالانۋ قۇقىعى ق ر بەكىتكەن حالىقارالىق شارتتارعا سايكەس جۇزەگە اسىرىلادى.
«2017 جىلعى مامىردا استانا قالاسىنىڭ اكىمدىگى اتالعان ۋچاسكەنى سەگمەنتتەۋ بويىنشا جۇمىستى اياقتاپ، جەر تەلىمى مەملەكەتتىك مەنشىككە ءوتتى. وسىعان وراي قازاقستاندىق تاراپ اتالعان كەلىسىمدى راتيفيكاتسيالاۋ بويىنشا ءراسىمدى باستاعان بولاتىن. كەلىسىمنىڭ 13- بابىنا سايكەس تاراپتار ونىڭ كۇشىنە ەنۋى ءۇشىن قاجەتتى مەملەكەتىشىلىك راسىمدەردى ورىنداعاندىعى تۋرالى سوڭعى جازباشا حابارلاما ديپلوماتيالىق ارنالار ارقىلى الىنعان كۇننەن باستاپ كۇشىنە ەنەتىن بولادى. تاجىكستان پارلامەنتى كەلىسىمدى 2014-جىلعى 1- قازانداعى قاۋلىسىمەن قابىلداعانىن اتاپ وتكەن ءجون»، - دەدى ول.
كوميتەت مۇشەلەرى زاڭ جوباسىن سەناتتىڭ جالپى وتىرىسىنا شىعارۋعا ءبىراۋىزدان كەلىستى.
