ەلىمىزدە 1 - شىلدەدەن باستاپ 1,7 ميلليون گەكتار جەر ساۋداعا تۇسەدى - ە. دوسايەۆ
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ق ر ۇلتتىق ەكونوميكا ءمينيسترى ەربولات دوسايەۆ ءمالىم ەتتى. ونىڭ اتاپ وتۋىنشە، 1,7 ميلليون گەكتار جەردىڭ بۇگىنگى كۇنى 645,4 مىڭ گەكتارى نەمەسە 1271 ۋچاستوك ساتىلىمعا دايىن.
«قازىرگى ۋاقىتتا جالعا الىپ وتىرعاندارعا جەردىڭ كاداسترلىق قۇنىنىڭ 50 پايىزدىق كولەمىن 10 جىلعا ءبولىپ تولەۋ مۇمكىندىگىمەن جەڭىلدىكتەر بەرىلەدى. ساتۋ ءۇشىن اۋكسيونعا قويىلعان جەردىڭ كاداسترلىق قۇنى جەر ۋچاسكەسىنىڭ باستاپقى باعاسى بولىپ سانالادى»، - دەدى مينيستر.
ۇلتتىق ەكونوميكا مينيسترلىگى اقپاراتىنا قاراعاندا، 2 اۋكسيون بارىسىندا كاداسترلىق قۇنى كوتەرىلىپ، ۋچاستوك ساتىلماسا، وندا ول ءۇشىنشى مارتە كاداسترلىق قۇنىنىڭ 50 پايىزدىق مولشەرىمەن ساتىلىمعا شىعارىلادى.
ايتا كەتەرلىگى، بۇگىنگى كۇنى 454 جەردى پايدالانۋشى (108,2 مىڭ گەكتار) جالعا الىنعان اۋىل شارۋاشىلىعى جەرىن جەكە مەنشىككە الۋ ءۇشىن ءوتىنىش بەرگەن.
«2015 - جىلعى جەلتوقساندا جاڭا رەسۋرستىق بازا قۇرۋ اياسىندا وڭايلاتىلعان ءتاسىل بويىنشا اۋكسيوندار ارقىلى 38 ۋچاسكە وتكىزىلدى جانە اعىمداعى جىلدىڭ 1 - شىلدەسىنە دەيىن ساۋدا- ساتتىققا تاعى دا 100 ۋچاسكە شىعارىلادى»، - دەدى مينيستر.
سونىمەن قاتار، ە. دوسايەۆ اۆستراليالىق تاسىلمەن جەر قويناۋىن پايدالانۋعا 10 ۇلگىلىك كەلىسىمشارت جاسالعانىن اتاپ ءوتتى.
اۆتور: مارلان جيەمباي
