ە و ورتالىق ازيامەن ىنتىماقتاستىقتى 4 باعىت بويىنشا ىلگەرىلەتپەك - ۋرسۋلا فون دەر ليايەن
سامارقاند. KAZINFORM - ەۋروپا وداعى ورتالىق ازيامەن ىنتىماقتامتىقتى 4 نەگىزگى باعىت بويىنشا ىلگەرىلەتۋگە مۇددەلى، دەپ حابارلايدى Kazinform اگەنتتىگىنىڭ مەنشىكتى ءتىلشىسى ءاليحان اسقار.
بۇل تۋرالى «ورتالىق ازيا - ەۋروپا وداعى» سامميتى اياسىندا وتكەن باسپا ءسوز ءماسليحاتىندا ەۋروپالىق كوميسسيا پرەزيدەنتى ۋرسۋلا فون دەر ليايەن ءمالىم ەتتى.
ىنتىماقتاستىقتىڭ ءبىرىنشى باعىتى - كولىك دالىزدەرىن دامىتۋ. ۋرسۋلا فون دەر ليايەن اتاپ وتكەندەي، ەۋرووداق ترانسكاسپي كولىك دالىزىنە 10 ميلليارد ەۋرو بولۋگە نيەتتى. قاراجات قوس ءوڭىر اراسىنداعى جۇك تاسىمالى ۋاقىتىن 15 كۇنگە دەيىن قىسقارتۋعا مۇمكىندىك بەرەتىن جوبالاردى ىسكە اسىرۋعا باعىتتالادى.
- ترانس كاسپي كولىك ءدالىزى ورتالىق ازيانىڭ 5 ەلىمەن ەۋروپا اراسىنداعى بايلانىستى نىعايتا تۇسەرىنە سەنىمدىمىن، - دەدى ۋرسۋلا فون دەر ليايەن باسپا ءسوز ءماسليحاتىندا.
ەكىنشى باعىت ماڭىزدى مينەرالدار توڭىرەگىندەگى جوبالارعا قاتىستى. بۇل رەتتە ەۋروپالىق كوميسسيا پرەزيدەنتى پايدالى قازبا بايلىقتارىن وندىرۋمەن شەكتەلمەك، جەرگىلىكتى ونەكاسىپتى دامىتۋعا كومەك كورسەتىلەتىنىن ايتتى.
- ەۋروپا وداعى جەرگىلىكتى ونەركاسىپتى دامىتۋعا جانە ايماقتا دايىن تاۋار شىعاراتىن كاسىپورىندار قۇرۋ بويىنشا كومەك كورسەتەدى. تيىسىنشە، جاڭا جۇمىس ورىندارى قۇرىلىپ، ەكونوميكا وركەندەيدى، - دەپ توقتالدى.
ىنتىماقتاستىقتىڭ ءۇشىنشى باعىتى - جاسىل ەنەرگيا. ۋرسۋلا فون دەر ليايەننىڭ ايتۋىنشا، ورتالىق ازيا ەلدەرى ىشكى جانە سىرتقى سۇرانىستى جابۋعا جەتەتىن ەكولوگيالىق تازا ەنەرگيا ءوندىرىپ جاتىر.
ال ەۋروپالىق كوميسسيا پرەزيدەنتى توقتالعان ءتورتىنشى باعىت - سپۋتنيكتىك ينتەرنەتتى دامىتۋ. ەۋرو وداق كەلەر جىلدارى ورتالىق ازياداعى 1700 ەلدى مەكەندى ينتەرنەتپەن قامتۋدى جوسپارلاپ وتىر.
- سامارقاند سامميتى ورتالىق ازيا مەن ەۋروپا وداعى اراسىنداعى قارىم-قاتىناستىڭ جاڭا تاراۋىن اشتى. وسىلايشا، ءبىز ستراتەگيالىق سەرىكتەستىكتى بۇگىننەن باستايمىز، - دەپ تۇيىندەدى ۋرسۋلا فون دەر ليايەن.
ايتا كەتەيىك، بۇگىن وزبەكستاننىڭ سامارقاند قالاسىندا «ورتالىق ازيا - ەۋروپا وداعى» فورماتىنداعى العاشقى ءسامميتى ءوتتى. ونىڭ بارىسىندا مەملەكەت باسشىسى قاسىم- جومارت توقايەۆ ءبىرقاتار باستاما كوتەردى.
اۆتور
ءاليحان اسقار
