ە و مەن ا ق ش ساۋدا كەلىسىمى بويىنشا جۇمىسىن جەدەلدەتەدى
استانا. KAZINFORM - ەۋروكوميسسيا ءتوراعاسى ۋرسۋلا فون دەر ليايەن كاناداداعى G7 سامميتىندە ا ق ش پرەزيدەنتى دونالد ترامپپەن نەگىزگى ساۋدا ماسەلەلەرىن تالقىلاعانىن جانە تاريف بويىنشا كەلىسىمگە كەلۋ ءۇشىن جۇمىس توپتارىنا كەلىسسوز پروتسەسىن جەدەلدەتۋدى تاپسىرعانىن ايتتى، دەپ حابارلايدى انادولى.
سامميتكە قاتىسقاننان كەيىن الەۋمەتتىك جەلىدەگى جازباسىندا ۋرسۋلا فون دەر ليايەن سامميت سەرىكتەستەر اراسىندا تەرەڭ جانە سىندارلى تالقىلاۋعا مۇمكىندىك بەرگەنىن اتاپ ءوتتى.
- مەن پرەزيدەنت ترامپپەن ۋكرايناداعى جاعدايدان باستاپ ساۋداعا دەيىنگى ماڭىزدى ماسەلەلەردى تالقىلادىم، - دەدى ول.
ەۋروكوميسسيا ءتوراعاسى جۇمىس توپتارىنا ءادىل جانە ءوزارا ءتيىمدى ساۋدا كەلىسىمىنە قول جەتكىزۋ ءۇشىن جۇمىسىن جەدەلدەتۋدى تاپسىرعانىن قوسا ايتتى.
2 -ساۋىردە ترامپ ونداعان ەلگە، سونىڭ ىشىندە ە و مەملەكەتتەرىنە 10-نان 50 پايىزعا دەيىن يمپورتتىق باج سالىعىن ەنگىزەتىنىن مالىمدەدى. كەيىنىرەك ول 75-تەن استام ەل ءۇشىن تاريفتەردى 90 كۇنگە كەشىكتىرۋگە شەشىم قابىلدادى. سونىمەن قاتار، ا ق ش بولات، اليۋميني جانە تۋىندى ونىمدەرگە، سونداي-اق ە و- دان كەلەتىن كولىكتەرگە 25 پايىزدىق باج سالىعىن ەنگىزدى. بۇعان جاۋاپ رەتىندە ەۋروپالىق وداق امەريكالىق تاۋارلاردىڭ ەكسپورتىنا قارسى شارالار ەنگىزۋ جوسپارىن جاريالادى.
23 - مامىردا ا ق ش پرەزيدەنتى دونالد ترامپ 1- ماۋسىمنان باستاپ ە و تاۋارلارىنا 50 پايىزدىق باج سالىعىن ەنگىزۋ نيەتى تۋرالى مالىمدەدى، ءبىراق فون دەر ليايەنمەن تەلەفون ارقىلى سويلەسكەننەن كەيىن ا ق ش بۇل تاريفتەردى ەنگىزۋدى 9 -شىلدەگە قالدىرۋ تۋرالى شەشىم قابىلدادى. وسى ۋاقىتتىڭ بارلىعىندا تاراپتار كەلىسىم بويىنشا بەلسەندى كەلىسسوز جۇرگىزدى.
