ەڭ كرەاتيۆتى جاستار پرەزيدەنتتىڭ جەكە موبيلوگرافى بولۋ مۇمكىندىگىن الادى
استانا. KAZINFORM - ەڭ جاس جانە كرەاتيۆتى موبيلوگراف پرەزيدەنتتىڭ جەكە موبيلوگرافى بولۋى مۇمكىندىگىن الادى. بۇل تۋرالى تانىمال موبيلوگراف، رەجيسسەر قىران تالاپبەك ءوزىنىڭ Instagram پاراقشاسىندا جاريالادى.
«بۇل - تاريحي ءسات، ەڭ جاس جانە كرەاتيۆتى موبيلوگراف پرەزيدەنتتىڭ 1 كۇندىك جەكە موبيلوگرافى بولا الادى. بۇل جاڭا كاسىپ ەلىمىزدىڭ تاريحىن جاسايتىن - تاريحي كەزەڭ. قۇرمەتتى حانىمدار مەن مىرزالار، بارلىق شاكىرتتەرىمىز بەن موبيلوگرافتار، كونتەنتمەيكەرلەر! ۆيدەولارىڭىزدى تيكتوك جانە ينستاگرامعا #nomadgamesfest سالىڭىز. كوشپەندىلەر ويىندارىنا ارنالعان ەڭ كرەاتيۆتى پرومو- روليك ءتۇسىرىپ، ونى الەۋمەتتىك جەلىلەرگە، WhatsApp, Telegram-عا #nomadgamesfest حەشتەگىمەن جاريالاڭىز. بۇل - ءسىزدىڭ ءوزىڭىزدىڭ قابىلەتتەرىڭىزدى كورسەتىپ، كەرەمەت سىيلىقتار ۇتىپ الاتىن مۇمكىندىگىڭىز!»، - دەپ جازدى ق. تالاپبەك.
بۇل تۇرعىدا ق ر پرەزيدەنتىنىڭ كەڭەسشىسى - پرەزيدەنتتىڭ ءباسپاسوز حاتشىسى بەرىك ءۋالي بيىل قىركۇيەك ايىندا مەملەكەت باسشىسىنىڭ باستاماسىمەن V دۇنيەجۇزىلىك كوشپەندىلەر ويىندارى وتەتىنىن ەسكە سالدى.
«وعان الەمنىڭ 90 عا جۋىق مەملەكەتىنەن 2 مىڭنان استام سپورتشى قاتىسادا. سوندىقتان بۇل باسەكەنىڭ ءباسى بيىك. بابادان قالعان مول مۇرانى، بۇگىنگە جەتكەن اسىل قازىنانى كوزىمىزدىڭ قاراشىعىنداي ساقتاپ، بولاشاققا ميراس ەتۋ - بۇگىنگى ۇرپاقتىڭ بورىشى. وسى ورايدا پرەزيدەنتتىڭ ءباسپاسوز قىزمەتى مەن Kyran Films كومپانياسى V دۇنيەجۇزىلىك كوشپەندىلەر ويىندارى تۋرالى ۇزدىك بەينەروليك بايقاۋىن ۇيىمداستىرۋدى كوزدەپ وتىر. ماقسات - تامىرى تەرەڭنەن تارتاتىن سپورتتىق ويىنداردى حالىق اراسىندا كەڭىنەن ناسيحاتتاۋ، كوشپەندىلەر ويىندارىنىڭ ءمانى مەن ماڭىزىن ارتتىرۋ، ءدۇبىرلى دودانىڭ جوعارى دەڭگەيدە وتۋىنە اتسالىسۋ»، - دەدى بەرىك ءۋالي.
بايقاۋ اياسىندا گران- پريگە پرەزيدەنتتىڭ جەكە موبيلوگرافى بولۋ، iPhone 15 Pro Max, MOBILOGRAPHY BOX (جارىق، ميكروفون) جانە 1000000 تەڭگە قاراستىرىلعان.
2 ورىن - 1000000 تەڭگە.
3 ورىن- iPhone 15 Pro Max.
4 ورىن- 500000 تەڭگە.
5-15 ورىندار- MOBILOGRAPHY box (جارىق جانە ميكروفوندار) .
16-20 ورىندار - موبيلوگرافيا كۋرسى (ونلاين وقۋ) .
21-100 ورىندار- جەكە ماداقتامالار.
101-150 ورىندار - ارنايى سەرتيفيكاتتار.
بولەك 50 ورىن قاراستىرىلعان. ۆيدەوڭىز الەۋمەتتىك جەلىدە 100000 جيناعان قارالىمىڭىز ءۇشىن 50000 تەڭگە سىيلىققا بەرىلەدى (TikTok, Instagram) .
«قاتىسۋشىلارد- 1 قىركۇيەككە دەيىن قابىلدايمىز، ال جەڭىمپازداردى 9-قىركۇيەكتە انىقتايمىز. قاتىسىڭىزدار، تاريحتى بىرگە جاسايىق!» - دەيدى قىران تالاپبەك.
