ماس بولىپ، كولىك ايداعان دەپۋتاتتىڭ ءىسى سوتتا قارالادى

اقتوبە قالالىق ءماسليحاتىنىڭ دەپۋتاتى كولىكتى ماس كۇيىندە جۇرگىزگەنى ءۇشىن جاۋاپقا تارتىلادى.

قازىرگى كەزدە اكىمشىلىك قۇقىقبۇزۋشىلىق تۋرالى كودەكستىڭ 2- بابى بويىنشا ءىس قوزعالدى، دەپ حابارلايدى قازاقپارات ءتىلشىسى.

اقتوبە قالالىق ءماسليحاتىنىڭ دەپۋتاتى سانيا مۇراتوۆا قالاداعى س. بايىشيەۆ كوشەسىندە جول قوزعالىسى ەرەجەلەرىن بۇزعان. ول «Lexus» اۆتوكولىگىن ماس كۇيىندە جۇرگىزگەن.

پوليتسيا 53 جاستاعى ايەلدىڭ كولىگىن توقتاتقان. قۇجاتتارىن تەكسەرۋ كەزىندە جۇرگىزۋشىدەن الكوگولدىڭ ءيىسى شىعىپ تۇرعانى بايقالدى. جۇرگىزىلگەن ساراپتاما ناتيجەسى ونىڭ الكوگولدى ماس كۇيدە بولعانىن كورسەتتى. جۇرگىزۋشىگە ق ر اكىمشىلىك قۇقىقبۇزۋشىلىق تۋرالى كودەكستىڭ 596-بابىنىڭ 3-بولىگى (كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ) جانە 608-بابىنىڭ 1-بولىگى (كولىك قۇرالىن ماس كۇيدە جۇرگىزۋ) بويىنشا حاتتاما تولتىرىلىپ، ماتەريال جينالدى جانە زاڭدى شەشىم قابىلداۋ ءۇشىن اكىمشىلىك سوتقا جىبەرىلەتىن بولادى، - دەپ حابارلادى وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ جەتەكشىسى ەربولات سارقۇلوۆ.

سوت كابينەتىنەن مۇراتوۆا سانيا بۇلقايىر قىزىنا قاتىستى ءىس سۋديا د. حاميەۆكە تۇسكەنىن، نەگىزگى سوت وتىرىسى باستالعانىن كورۋگە بولادى.

ايتا كەتەيىك، كولىك قۇرالىن ماس كۇيدە باسقارعانى ءۇشىن 15 تاۋلىككە اكىمشىلىك قاماققا الۋ جانە كولىك قۇرالىن باسقارۋ قۇقىعىنان 7 جىل مەرزىمگە ايىرۋ كوزدەلگەن. بۇل باپتىڭ سانكسياسىندا جازانىڭ وزگە ءتۇرى قاراستىرىلماعان.