ەكس-مينيستر اسحات ايماعامبەتوۆ جاقسى مۇعالىم قانداي بولۋ كەرەگىن ايتتى
بۇرىنعى وقۋ-اعارتۋ ءمينيسترى اسحات ايماعامبەتوۆ ايگەرىم سەيفوللاعا بەرگەن سۇحباتىندا شەبەر مۇعالىم قانداي بولۋ كەرەگىن ايتىپ بەردى.
ەكس-مينيستر ءوزىنىڭ العاشقى مۇعالىمى جايلى ايتتى.
«ۇستازداردىڭ ءرولى وتە ۇلكەن. مىسالى، مەنىڭ ءبىرىنشى مۇعالىمىم بولدى. مەن باستاۋىشتا جانە ودان كەيىن دە وقىعاندا مەن ءوزىمدى سول مۇعالىمنىڭ ەرەكشە جاقسى كورەتىن وقۋشىسىمىن دەپ ويلايتىنمىن. ماعان سولاي سياقتى بولىپ كورىندى. مىسالى، ول پارتالاردىڭ جانىنان وتەدى، سول كەزدە مەنىڭ جانىمنان وتكەندە قاسىمدا كىشكەنە كوبىرەك تۇرىپ، داپتەرىمە قاراپ، باسىمنان سيپاپ، كۇلىمسىرەپ تۇراتىن سياقتى بولىپ قابىلدايتىنمىن. سول ءۇشىن مەنىڭ دە وعان ەرەكشە كوزقاراسىم بولاتىن. ودان كەيىن ءبىراز ۋاقىت وتكەن سوڭ مەكتەپتى بىتىرگەننەن كەيىن بىرگە وقىعان بىرنەشە بالالارمەن سويلەسىپ، ەسكە الىپ وتىرعاندا ءارقايسىسىمىز ءوزىن ءدال سولاي سەزىنگەنىنە كوزىم جەتتى. مەن ويلادىم مەن عانا ول مۇعالىمنىڭ جاقسى كورەتىن بالاسى بولدىم دەپ، سويتسەم جانىمىزدا وتىرعان بىرگە وقىعان بالالاردىڭ ءارقايسىسى ءوزىن سولاي سەزىنگەن. مىنە، وسى مۇعالىمنىڭ شەبەرلىگىنىڭ كورىنىسى. ءار بالانىڭ ءوزىن ەڭ جاقسى كورەتىن بالاسى سياقتى سەزىنۋى»، - دەدى اسحات ايماعامبەتوۆ.
جۋرناليست بۇرىنعى وقۋ-اعارتۋ مينيسترىنەن ارمانىنداعى مۇعالىم قانداي ەكەنىن سۇرادى.
«مەنىڭ ويىمشا، بالا مەكتەپكە كەلگەندە ءوزىن باقىتتى سەزىنۋى كەرەك. ءوزىن قاۋىپسىز جەردە ەكەنىن سەزىنۋ كەرەك. ءوزىن كادىمگىدەي كۇتىپ وتىرعان جەرگە بارعانىن سەزۋ كەرەك. مەكتەپ دەگەن جاي عانا اقپارات بەرەتىن جەر ەمەس. ەگەر مەكتەپتە بالا باقىتتى بولاتىن بولسا، وندا بىزدە جالپى قوعام دا باسقا بولار ەدى. سوعان بايلانىستى بالاعا جاعداي جاساۋىمىز كەرەك. مەكتەپتەگى ەڭ باستى كەيىپكەر مۇعالىم ەمەس، ديرەكتور ەمەس، بالا بولۋى كەرەك. مىنە، بالاعا نەگىزدەلگەن ءبىلىم بەرۋ جۇيەسى. ويتكەنى ەڭ باستىسى ءبىز كىمدى تاربيەلەپ جاتىرمىز؟ ءبىز قازاقستاننىڭ بولاشاق ازاماتتارىن تاربيەلەپ جاتىرمىز.
سوندىقتان مۇعالىم بالانى جاقسى كورىپ، وعان ءتيىستى جاعداي جاساپ، باسىنان سيپاپ، جىلى سوزدەر ايتسا، بالادا قۇشتارلىق باسقاشا بولادى. بالانىڭ اتى - بالا. بالاعا قانداي كوزقاراس بولادى، بالانى قالاي قارسى الادى، ول دا سول ادامدى جاقسى كورەتىن بولادى.
ءبىز پەداگوگ ستاتۋسىن ءوسىرۋ جايلى شەشىم قابىلداعان سەبەبىمىز - تۇبىندە بالالار ءۇشىن بولاتىن. مۇعالىمنىڭ جالاقىسىن كوتەرۋ نە ءۇشىن كەرەك؟ ول وسى ماماندىققا ەڭ مىقتى ماماندار كەلۋ ءۇشىن، وسى ماماندىقتاعى مۇعالىمدەردىڭ جاقسى كوڭىل كۇيمەن جۇمىسقا كەلۋى ءۇشىن، ولاردىڭ ءال- اۋقاتىن، مارتەبەسىن كوتەرۋ ءۇشىن كەرەك. نەگە؟ ويتكەنى بالانىڭ باقىتتى، ءبىلىمدى بولۋى ءۇشىن جانە جاقسى تاربيە الۋى ءۇشىن كەرەك. بۇل رەفورما قازىر دە جەمىسىن بەرىپ جاتىر جانە ارى قاراي دا جالعاسادى دەپ ويلايمىن»، - دەدى ول.
massaget.kz
