اۋعانستاندا ايەلدەر بازارى اشىلدى

اۋعانستان استاناسى كابۋلدا ايەلدەر بازارى اشىلدى. ماقسات - كەيىنگى ەكى جىلدا جۇمىسسىز قالعان 100 دەن استام كاسىپكەر ايەلدى جۇمىسقا ورنالاستىرۋ، دەپ حابارلايدى قازاقپارات TOLO News سايتىنا سىلتەمە جاساپ.

بازاردىڭ نەگىزىن قالاۋشى رادجمانا حاليكيدىڭ ايتۋىنشا، بازاردى اشۋداعى نەگىزگى ماقسات - قازىرگى جاعدايدا اۋعانستاندا تۇراتىن ايەلدەرگە قولايلى جاعداي جاساۋ.

ءبىر وتباسىنىڭ جالعىز اسىراۋشىسى وليا احماديار بيزنەسپەن اينالىسقانىنا 18 جىلدان استام ۋاقىت وتكەنىن جانە دۇكەندە ءوز ونىمدەرىن سەنىمدى تۇردە ساتا الاتىنىن ايتادى.

ىسكەر ايەلدەر وزدەرىنە قاۋىپسىز كەڭىستىك جاسالعانىنا ريزاشىلىق ءبىلدىرىپ، يسلام امىرلىگىنەن ىسكەر ايەلدەرگە قولداۋ كورسەتۋدى سۇرادى.

بازاردان زات ساتىپ الۋعا كەلگەن كەيبىر ايەلدەر يسلام امىرلىگىنەن جۇمىس ىستەۋگە مۇمكىندىك بەرۋىن سۇرادى.

«ءبىز يسلام امىرلىگىنەن ايەلدەردىڭ اياعىنان تىك تۇرۋى ءۇشىن جۇمىس ىستەۋگە رۇقسات بەرۋىن سۇرايمىز. ويتكەنى ارامىزدا وتباسىندا ەر ازاماتى جوق ايەلدەر بار، سوندىقتان ولاردى جۇمىسپەن قامتۋ كەرەك»، - دەدى مەيرامحانا مەنەدجەرى مينا.

بازار شامامەن 20 اكر اۋماقتى الىپ جاتىر. بازاردىڭ قۇرىلىسىنا 50 ميلليون اۋعاني جۇمسالدى.