ۇ ب ت- دان 140 بالدى قالاي الۋعا بولادى - ۇزدىكتەردەن لايفحاك

استانا. KAZINFORM – ۇ ب ت- دا مەجەلى 140 بالدى جيناۋ ءۇشىن ۋاقىتتى ءتيىمدى پايدالانۋ كەرەك. ناۋرىز ايىندا وتكەن ۇ ب ت- نىڭ قورىتىندىسى بويىنشا بىردە-ءبىر سۇراقتان ءمۇلت كەتپەگەن اياگوز اققانوۆا مەن سانجار قۋاندىق ءدال وسىلاي دەيدى.

Jibek Joly ارناسىنىڭ «بۇگىن LIVE» باعدارلاماسىنا سۇحبات بەرگەن وقۋشىلار مۇنداي ناتيجەگە قالاي جەتكەندەرىن ايتىپ بەردى.

- بۇل تىنىمسىز ەڭبەكتىڭ ناتيجەسى دەپ ويلايمىن. ۋاقىتتى ءتيىمدى پايدالانىپ، ءونىمدى ءبىلىم الۋ كەرەك. مىسالى، 8-9 ساعات توقتاۋسىز وقۋعا بولادى، ءبىراق ول ءونىمسىز بولۋى مۇمكىن. ال 5-6 ساعات بارلىق نازاردى ساباققا اۋدارىپ دايىندالساڭ، ءتىپتى 140 بالدان دا اسىرۋعا بولادى، - دەيدى سانجار.

ءبىلىمپاز جاستار ۇ ب ت تەستىلەۋىنە دايىندالۋ ءۇشىن بىرنەشە لايفحاكپەن دە ءبولىستى.

- ۇ ب ت- عا ناتيجەلى دايىندالۋدىڭ ءارتۇرلى تاسىلدەرى بار. ماسەلەن، جۇپتاسىپ جۇمىس ىستەۋگە بولادى. وزىمىزگە ءبىر سەرىكتەس تاڭداپ الامىز. سوسىن بەلگىلى ءبىر تاقىرىپتى تەرەڭ وقىپ، ءبىر-بىرىمىزگە سول تاقىرىپ بويىنشا سۇراق قويامىز. سولاي ەكى وقۋشى ءبىر-ءبىرىن دايىندايدى. بۇل ءوز قاتەلەرىڭمەن جۇمىس ىستەۋگە، سۇراقتىڭ كەز كەلگەن سيپاتىنا دايىن بولۋعا ۇيرەتەدى، - دەيدى اياگوز.

استاناعا الماتى وبلىسىنان العاش رەت كەلىپ، قالانىڭ اسەم كورىنىسىنە كوزى تويماي جۇرگەن سانجار قۋاندىق وسىندا وقۋعا تۇسكىسى كەلەتىنىن دە جاسىرمادى. ول بولاشاقتا قازاق ءتىلى مەن ادەبيەتى ءپانىنىڭ مۇعالىمى بولۋدى قالايتىنىن ايتادى.

- كوبىنەسە بۇل ماماندىقتى قىز بالالار تاڭدايدى. مەنىڭ وسى ماماندىققا تۇسكىم كەلەتىنىن ەستىگەندە باسقالار: «نەگە ەرلەرگە ءتان ماماندىق تاڭدامادىڭ؟» - دەپ تاڭقالادى. مەنىڭشە، ەر ادامنىڭ مۇعالىم بولعانى ءتيىمدى. مەنىڭ باتىل ەسىمدى اعايىم بار. نەبارى 21 جاستا بولسا دا، ونىڭ ءوزىن ءوزى ۇستاۋى، بايسالدىلىعى مەنى ءتانتى ەتتى. مۇعالىم بولۋعا موتيۆاتسيانى سول كىسىدەن الامىن. مەنىڭ بويىما كوپتەگەن جاقسى قاسيەتتى ءسىڭىرىپ جاتىر دەپ ايتسام بولادى. وسى ۇستازىمنان ۇيرەنگەندەرىمدى كەيىن بالالارعا بەرگىم كەلەدى، - دەيدى ول.

ال اياگوز الەمدە بەيبىتشىلىك بولعانىن قالايدى. سول ءۇشىن حالىقارالىق قاتىناستار جانە ديپلوماتيا ماماندىعىنىڭ ناعىز مايتالمانى بولعىسى كەلەتىنىن ايتتى.

- ارمانىم - ەلشى بولۋ. مەملەكەتتەر اراسىنداعى جانجالداردى شەشۋگە ءوز ۇلەسىمدى قوسقىم كەلەدى. الەمدە بەيبىتشىلىك بولعانىن قالايمىن. بولاشاقتا قىتاي، فرانسيا سىندى مەملەكەتتەرمەن جۇمىس ىستەگىم كەلەدى، - دەيدى بولاشاق ستۋدەنت.

الدا گرانت يەگەرلەرىن انىقتايتىن ءالى 2 تەستىلەۋ بار.

ەسكە سالا كەتەيىك، الماتى وبلىسىندا 11-سىنىپ وقۋشىسى ۇ ب ت- دان 140 بال جيناعان ەدى.

سونىمەن قاتار ناۋرىز ايىندا 22 تالاپكەردىڭ ناتيجەسى جويىلدى.

اۆتور

ارۋجان ماحمۋت