ە ا ە و ەلدەرىنىڭ كەدەندىك باج ۇلەسىن ەسەپتەۋدىڭ جاڭا ادىستەمەسى ەنگىزىلۋى مۇمكىن
استانا. KAZINFORM - ەۋرازيالىق ەكونوميكالىق كوميسسيانىڭ ەكونوميكا جانە قارجى ساياساتى ءمينيسترى باقىتجان ساعىنتايەۆ ەۋرازيا ەكونوميكالىق وداعىنا مۇشە ەلدەردىڭ كەدەندىك باج ۇلەسىن قايتا قاراۋ ماسەلەسى نەگە كەشەۋىلدەپ جاتقانىن ايتتى.
- رەسەي مەن ۋكراينا اراسىنداعى سوعىسقا بايلانىستى بۇل اڭگىمە 2022 -جىلى باستالعان. ويتكەنى تاۋارلار قازىر ەكونوميكالىق وداق ەلدەرىنە قازاقستان مەن قىرعىزستان ارقىلى كىرىپ جاتىر. سول كەزدە بۇل ماسەلە كوتەرىلگەن. قازاقستان تاراپى دا ايتتى. ەۋرازيا ەكونوميكالىق كوميسسياسىندا قارالدى. قازىر تاۋار اعىنى تۇگەل وزگەرىپ جاتىر. سول سەبەپتى بۇل ۇكىمەت باسشىلارىنىڭ كەڭەسىندە، ءتىپتى مەملەكەت باسشىلارى دەڭگەيىندە دە ۇسىنىلعان بولاتىن. سول جەردە ءتيىستى ادىستەمە جاساۋ كەرەك دەگەن تاپسىرما بەرىلگەن. سول ارقىلى شەشەمىز دەگەن ۇيعارىم بولعان،- دەدى ول استانا حالىقارالىق فورۋمىنىڭ كۋلۋارىندا
ايتۋىنشا، ەكونوميكالىق وداققا مۇشە ەلدەردىڭ ۇلەسىن ەسەپتەۋدىڭ جاڭا نۇسقاسىن ەنگىزۋگە رەسەي مەن بەلارۋستىڭ اسىعاتىن ءتۇرى جوق.
- ولار «بۇلاي بولمايدى، بۇل ۋاقىتشا بولىپ جاتقان دۇنيە، كەيىن ءبارى ورنىنا تۇسكەن كەزدە قايتادان قالپىنا قايتىپ كەلەمىز، سوندا ءبىز ءار كەزدە اۋىسىپ جاتامىز با» دەگەن ءۋاج ايتىپ وتىر. سودان ءبىزدىڭ ساراپشىلار، ۇكىمەتتەگىلەر اراسىندا پىكىرتالاس بولعان كەزدە «وندا ادىستەمەسىن جاسايىق، ءارتۇرلى جاعداي بولعاندا ادىستەمەگە سۇيەنەيىك» دەدى. ءالى ايتىس بولىپ جاتىر.
ءبىراز ارىپتەستەرىمىز جىلى جاۋىپ قويعىسى كەلەدى، ءبىراق ىلعي كوتەرىپ وتىرمىز. قازىر ەكونوميكا، قارجى بلوگىن ءبىز باسقارىپ وتىرمىز. ءاردايىم قازاقستان ۇكىمەتىمەن ءتيىستى جۇمىستى ىستەپ جاتىرمىز، - دەدى باقىتجان ساعىنتايەۆ.
ايتا كەتەيىك، ەلوردادا مەملەكەت باسشىسى قاسىم-جومارت توقايەۆتىڭ قاتىسۋىمەن استانا حالىقارالىق فورۋمى ءوتىپ جاتىر.
اۆتور
ەسىمجان ناقتىباي
