ەلىمىزدە بالالاردى مەكتەپكە قابىلداۋ ءتارتىبى وزگەرۋى مۇمكىن

بالالاردى مەكتەپكە قابىلداۋعا قاجەت قۇجاتتاردى تاپسىرۋ مەرزىمى وزگەرۋى مۇمكىن. بۇل تۋرالى اشىق ن ق ا پورتالىندا جاريالانعان وقۋ- اعارتۋ مينيسترلىگىنىڭ بۇيرىق جوباسىندا جازىلعان، دەپ حابارلايدى قازاقپارات ءتىلشىسى.

«ءبىرىنشى سىنىپقا قابىلداناتىن بالالاردىڭ اتا- اناسىنان نەمەسە وزگە دە زاڭدى وكىلدەرىنەن قۇجات قابىلداۋ اعىمداعى جىلدىڭ 1-ساۋىرىنەن باستاپ جۇزەگە اسىرىلادى»، - دەلىنگەن قۇجاتتىڭ جاڭا رەداكسياسىندا.

ايتا كەتەيىك، قولدانىستاعى تالاپ بويىنشا ءبىرىنشى سىنىپقا باراتىن بالالاردان قۇجات قابىلداۋ 1-ءساۋىر مەن 1-تامىز ارالىعىندا جۇرەدى. ەندى ول تامىزدان كەيىن دە جالعاسا بەرۋى ىقتيمال.

ويتكەنى، بۇعان دەيىن بەكىتىلگەن اياقتالۋ ۋاقىتى الىنىپ تاستالماق،

سونىمەن قاتار 10، 11، 12-سىنىپتارعا وقۋشىلاردان قۇجات قابىلداۋ مەرزىمى وزگەرەدى.

«ونىنشى، ون ءبىرىنشى، ون ەكىنشى سىنىپتارعا ءبىلىم الۋشىلاردى قابىلداۋ ولاردىڭ جەكە ءوتىنىشى نە اتا- اناسىنىڭ نەمەسە وزگە دە زاڭدى وكىلدەرىنىڭ ءوتىنىشىنىڭ جانە نەگىزگى ورتا ءبىلىم تۋرالى مەملەكەتتىك ۇلگىدەگى قۇجات نەگىزىندە جۇزەگە اسىرىلادى. ءوتىنىش كۇنتىزبەلىك جىلدىڭ 31 تامىزىنا دەيىن قابىلدانادى»، - دەپ جازىلعان وقۋ-اعارتۋ مينيسترلىگىنىڭ بۇيرىق جوباسىندا.

قازىرگى ەرەجەگە ساي، اتالعان سىنىپتارعا بالالاردان قۇجات قابىلداۋ 15-تامىزدا اياقتالادى. ەندى ونىڭ ۋاقىتى 31-تامىزعا دەيىن ۇزارادى.

قۇجات 3-قازانعا دەيىن كوپشىلىك تالقىسىندا بولادى.