شىمكەنتتە جالعان اككاۋنتپەن جۇرتتى الداعان قىز 1,5 جىلعا سوتتالدى
شىمكەنتتە الەۋمەتتىك جەلىدەن جالعان اككاۋنت اشىپ، الاياقتىقپەن اينالىسقان قىز 1,5 جىلعا سوتتالدى، دەپ حابارلايدى قازاقپارات ءتىلشىسى.
سوتتالۋشى الەۋمەتتىك جەلى قولدانۋشىلارىنىڭ پاراقشاسىن مۇقيات زەرتتەپ وتىرعان. سودان، جالعان اككاۋنت اشىپ، كوپشىلىكتەن قارىزعا اقشا الىپ كەلگەن. ءتىپتى، قىلمىستىق ويىن جۇزەگە اسىرۋ ءۇشىن، ول باسقا ادامداردىڭ جەكە پاراقشاسىنان جۇكتەپ الىنعان فوتوسۋرەتتەردى پايدالانعان.
«شىمكەنت قالاسى تۇرعىنىنىڭ جازعان ارىزى نەگىزىندە كريمينالدى پوليتسيا قىزمەتكەرلەرى قىلمىسقا قاتىسى بار 22 جاستاعى تۇركىستان وبلىسىنىڭ تۇرعىنىن ۇستادى. جاس قىز «اقپاراتتىق جۇيەنى پايدالانۋشىنى الداۋ نەمەسە سەنىمىن تەرىس پايدالانۋ جولىمەن جاسالعان الاياقتىق» بابى بويىنشا كىنالى دەپ تانىلدى. سوتتالۋشىعا 1,5 جىلعا باس بوستاندىعىن شەكتەۋ جازاسى تاعايىندالدى» دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
