كوميتەت شەتەلدەن اقشا الاتىن ادامداردىڭ ج س ن ءنومىرىن نەلىكتەن كوپشىلىككە جاريالادى

مەملەكەتتىك كىرىستەر كوميتەتى شەتەلدىك كوزدەردەن قارجىلاندىرىلاتىن تۇلعالاردىڭ ءتىزىمىن جاريالاۋعا تۇسىنىك بەردى، دەپ حابارلايدى قازاقپارات.

ايتا كەتەيىك، كەشە مەملەكەتتىك كىرىستەر كوميتەتى بيىلعى ءبىرىنشى جارتىجىلدىقتا شەتەلدىك كوزدەردەن اقشا نەمەسە وزگە دە مۇلىك العان تۇلعالاردىڭ ءتىزىمىن جاريالاعان ەدى.

الايدا وندا ولاردىڭ جەكە ج س ن ءنومىرى كورسەتىلگەندىكتەن بۇل جاعداي قوعامنىڭ اشۋىن تۋعىزدى.

قۇجاتقا ءار ءتۇرلى باعىتتا جۇمىس ىستەيتىن 240 ۇيىم مەن ازاماتتاردىڭ ەسىمى ەنگەن.

كوميتەتتىڭ حابارلاۋىنشا، 2018 -جىلدان باستاپ سالىق كودەكسىنە شەت مەملەكەتتەردەن، شەتەلدىكتەردەن، حالىقارالىق جانە شەتەلدىك ۇيىمداردان اقشا نەمەسە وزگە دە مۇلىك العان تۇلعالاردىڭ مەملەكەتتىك كىرىستەر ورگاندارىنا ەسەپ بەرۋى تۋرالى تالاپ ەنگىزىلگەن.

2022 -جىلى سالىق كودەكسىنىڭ 29-بابىنا وزگەرىس ەنگىزىلدى، وعان سايكەس مەم كىرىستەر كوميتەتى ءوزىنىڭ ينتەرنەت- رەسۋرسىندا شەتەلدىك كوزدەردەن اقشا نەمەسە وزگە دە مۇلىك العان تۇلعالاردىڭ ءتىزىلىمىن جاريالايدى.

«بۇل تۇزەتۋ ازاماتتاردىڭ مەملەكەتكە دە، ۇكىمەتتىك ەمەس ۇيىمدارعا دا سەنىمىنىڭ دەڭگەيىن ارتتىرۋعا باعىتتالعان. اتالعان نورمالاردى ىسكە اسىرۋ ماقساتىندا قارجى مينيسترلىگى ءتيىستى قاعيدانى بەكىتتى، تىزىلىمدە شەتەلدىك كوزدەردەن اقشا نەمەسە وزگە دە مۇلىك العان تۇلعالاردىڭ اتاۋى مەن سايكەستەندىرۋ ءنومىرى (ب س ن/ج س ن) كورسەتىلەدى (2018 -جىلعى 20 -اقپانداعى № 240 بۇيرىق). سالىق كودەكسىنىڭ 30-بابىنا سايكەس سالىق تولەۋشىنىڭ اتاۋى مەن سايكەستەندىرۋ ءنومىرى سالىقتىق قۇپيا بولىپ تابىلمايدى» دەپ تۇسىندىرەدى ۆەدومستۆودان.