بولاشاق ستيپەندياسىنىڭ 60 پايىزى قانداي ماماندىقتارعا بەرىلەتىنى بەلگىلى بولدى
«بولاشاق» باعدارلاماسى بويىنشا تەحنيكالىق جانە IT ماماندىقتارىنا گرانت سانى %60 دەيىن كوبەيدى.
بۇل تۋرالى عىلىم جانە جوعارى ءبىلىم مينيسترلىگىنىڭ رەسمي جاۋابىندا ايتىلعان، دەپ حابارلايدى قازاقپارات.
«بولاشاق» حالىقارالىق باعدارلاماسى تاۋەلسىز مەملەكەتىمىزدى دامىتۋعا، الەۋمەتتىك- ەكونوميكالىق سالاسىن ىلگەرىلەتۋگە ءتيىستى سالا ماماندارىن الەمنىڭ ماڭدايالدى وقۋ ورىندارىندا ءبىلىم الۋعا مۇمكىندىك بەرۋدە. مەملەكەت باسشىسىنىڭ 2022 -جىلعى 11-قاڭتارداعى پارلامەنت ماجىلىسىندە بەرگەن تاپسىرمالارىنا سايكەس، «بولاشاق» ستيپەندياسى شەڭبەرىندە يندۋستريالاندىرۋ كەزەڭىندە ەل ەكونوميكاسىنا قاجەت بولاتىن ينجەنەرلىك- تەحنيكالىق باعىتتا وتاندىق كادرلاردى دايارلاۋ بويىنشا ءتيىستى وزگەرىستەر ەنگىزىلدى. «بولاشاق» باعدارلاماسى بويىنشا تەحنيكالىق جانە IT ماماندىقتارىنا گرانت سانى %60 دەيىن كوبەيدى»، - دەپ جاۋاپ بەردى مينيسترلىك اگەنتتىك ساۋالىنا.
ۇمىتكەرلەردى قولداۋ ءۇشىن «ينجەنەرلىك- تەحنيكالىق قىزمەتكەرلەر» اتتى جاڭا جەڭىلدىك ساناتى ەنگىزىلگەن.
سونىمەن قاتار مينيسترلىك پەن حالىقارالىق باعدارلامالار ورتالىعىنىڭ باستاماسىمەن مەديتسينالىق قىزمەتكەرلەردىڭ كۆوتالىق ساناتى بەكىتىلدى.
وسىلايشا 2023 -جىلدان باستاپ ينجەنەرلىك-تەحنيكالىق قىزمەتكەرلەر مەن مەديتسينا ماماندارى جەڭىلدەتىلگەن شارتتارمەن «بولاشاق» حالىقارالىق ستيپەندياسىنىڭ كونكۋرستىق ىرىكتەۋىنە قاتىسا الادى.
«بۇعان دەيىن ىرىكتەۋگە جەڭىلدەتىلگەن شارتتارمەن اۋىلدىق جەرلەردەن ۇمىتكەرلەر عانا قاتىسا الاتىن. بۇل - وقىتۋدىڭ وسى باعىتتارى بويىنشا ۇمىتكەرلەردى قولداۋدىڭ قوسىمشا شارالارىنىڭ ءبىرى. اتالعان وزگەرتۋلەردىڭ ارقاسىندا قازاقستاندىق دارىگەرلەر مەن تەحنيكالىق قىزمەتكەرلەر جانە اۋىلدان شىققان ۇمىتكەرلەر 12 ايعا دەيىنگى تەگىن تىلدىك دايىندىقتان وتە الادى. بۇل شارالار، پرەزيدەنت تاپسىرماسىنا جانە ەل ەكونوميكاسىنا تەحنيكالىق مامانداردىڭ جەتىسپەۋشىلىگىنە بايلانىستى ەنگىزىلدى»، - دەيدى عىلىم مينيسترلىگى.
جالپى «بولاشاق» باعدارلاماسىمەن وسى كۇنگە دەيىن الەمنىڭ وقۋ ورىندارىندا 12430 مامان دايارلانعان.
ونىڭ ىشىندە الەۋمەتتىك- گۋمانيتارلىق باعىتتا %55 مامان وقىسا، تەحنيكالىق باعىت
بويىنشا تەك %36 ى ءبىلىم العان.
