تۇركىستان وبلىسىندا شارۋا قوجالىعى وزبەكستان ازاماتىن 5 جىل قۇلدىقتا ۇستاعان
تۇركىستان وبلىسىندا وزبەكستان ازاماتىن 5 جىلدان اسا ۋاقىت قۇلدىقتا ۇستاعان قوجالىق باسشىلارى انىقتالدى. مۇنى ىشكى ىستەر مينيسترلىگىندە وتكەن بريفينگىدە ۆەدومستۆونىڭ وكىلى شۇعىلا تۇرلىبەك ايتتى، دەپ حابارلايدى قازاقپارات ءتىلشىسى.
تۇركىستان وبلىسىندا وزبەكستان ازاماتىن 5 جىلدان اسا ۋاقىت قۇلدىقتا ۇستاعان قوجالىق باسشىلارى انىقتالدى. مۇنى ىشكى ىستەر مينيسترلىگىندە وتكەن بريفينگىدە ۆەدومستۆونىڭ وكىلى شۇعىلا تۇرلىبەك ايتتى، دەپ حابارلايدى قازاقپارات ءتىلشىسى.
53 جاستاعى جابىرلەنۋشىنى زاڭسىز ەڭبەككە ماجبۇرلەگەن ەكى ازاماتتى ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى قۇرىقتاعان.
«ەر ادامنىڭ ءتولقۇجاتىن الىپ، 2017 -جىلدان بەرى مال باعۋعا ماجبۇرلەگەن. جابىرلەنۋشى مال قورادا تۇرعان. جۇمىس ىستەمەيمىن دەپ قارسىلىق كورسەتكەندە وعان فيزيكالىق جانە پسيحولوگيالىق قىسىم جاسالعان»، - دەيدى ءى ءى م وكىلى شۇعىلا تۇرلىبەك.
اتالعان وقيعا بويىنشا سوتقا دەيىنگى تەرگەۋ ءجۇرىپ جاتىر. جابىرلەنۋشى وڭالتۋدان ءوتۋ جانە پسيحولوگيالىق كومەك الۋ ءۇشىن داعدارىس ورتالىعىنا ورنالاستىرىلدى.
سونىمەن بىرگە شۇعىلا تۇرلىبەك ەلدەگى كريمينوگەندىك احۋالعا توقتالدى. ونىڭ ايتۋىنشا، ەلىمىزدە ءبىر اپتا ىشىندە 2932 قىلمىس جاسالىپ، ونىڭ 1857- ءى تاۋلىك ىشىندە اشىلعان.
پوليتسيا قىزمەتكەرلەرى 5 كىسى ءولتىرۋ، 11 دەنساۋلىققا قاساقانا اۋىر زيان كەلتىرۋ، 24 توناۋ جانە 373 ۇرلاۋ قىلمىستارىن ءىزىن سۋىتپاي اشتى.
