داۋلەت تۇرلىحانوۆ المات كەبىسپايەۆتىڭ داۋعا قالۋىنا قاتىستى پىكىر ءبىلدىردى
ءماجىلىس دەپۋتاتى داۋلەت تۇرلىحانوۆ الماتىدا گرەك-ريم كۇرەسىنەن قازاقستان چەمپيونى المات كەبىسپايەۆتىڭ ءبىر جىگىتتى ۇرىپ جىعۋىنا قاتىستى پىكىرىن ءبىلدىردى، دەپ حابارلايدى قازاقپارات ءتىلشىسى.
ءماجىلىس دەپۋتاتى كەلەڭسىز جاعداي تۋرالى حاباردار ەكەنىن، كىنالى جاق زاڭ اياسىندا جاۋاپقا تارتىلۋى مۇمكىن ەكەنىن الەۋمەتتىك جەلىدە جازدى.
"بۇل كەلەڭسىز جاعداي تۋرالى مەن حاباردارمىن. قالاي بولعانىن ەستىدىم. وكىنىشكە قاراي، بۇل كەز كەلگەن قالادا بولىپ تۇراتىن تۇرمىستىق جاعداي. ونى بولدىرماۋعا تىرىسۋ كەرەك، ارينە. ءبىراق، بەس ساۋساق بىردەي ەمەس، ءار ادام بالاسىنىڭ ءوزىنىڭ جاراتىلىسىنا، تاربيەسى مەن مادەنيەتتىلىگىنە بايلانىستى. ورىن العان وقيعا بويىنشا ەكى تاراپ وزدەرى شەشىمگە كەلەر. زاڭ قورعاۋ ورگاندارى ءمان-جايدى ساراپتاپ، قورىتىندى شىعارار! كىنالى جاق زاڭ اياسىندا جاۋاپقا تارتىلار! ول - ۋاقىت ەنشىسىندە"، - دەپ جازدى حالىق قالاۋلىسى.
داۋلەت تۇرلىحانوۆ، سونداي-اق، ماسەلەنىڭ بايىبىنا بارماي، بايبالام سالۋدىڭ قاجەتى جوق ەكەنىن اتاپ ءوتتى.
"المات - چەمپيون! مەن ونى ءبىراز جىلداردان بەرى بىلەمىن! وتە اقىلدى، پاراساتتى، سىپايى جىگىت. تالاي ەل نامىسىن قورعاپ، تۋىمىزدى جەلبىرەتتى. بىرنەشە دۇركىن ازيا چەمپيونى، الەم جۇلدەگەرى اتاندى. قازىر المات سەربياداعى الەم چەمپيوناتىنا دايىندىق ۇستىندە. سوندىقتان دا ماسەلەنىڭ انىق-قانىعىنا جەتپەي، الدىن الا سپورتشىمىزدى تىعىرىققا تىرەمەيىك، دوستار! ءدال قازىر الماتقا قولداۋ قاجەت! الدا - ەل ابىرويى، جۇلدە، وليمپيادا جولداماسى! بولعان جاعداي زاڭ جولىمەن ۋاقىتىندا شەشىلەدى"، - دەپ جازدى پارلامەنت ءماجىلىسىنىڭ دەپۋتاتى داۋلەت تۇرلىحانوۆ.
ەسكە سالساق، الماتىدا ساۋدا ورتالىقتارىنىڭ بىرىندە المات كەبىسپايەۆتىڭ ءبىر جىگىتتى ۇرىپ قۇلاتقانى تۋرالى اقپارات تاراعان بولاتىن.
