زەينەتاقى جيناعى بار جۇمىسشى قازاقستاندىقتار عانا ەڭبەكپەن قامتىلعان بولىپ ەسەپتەلەدى

استانا. KAZINFORM - جىل سوڭىنا دەيىن 500 مىڭعا جۋىق ادامدى جۇمىسپەن قامتۋ جوسپارى بار. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسقار بياحمەتوۆ ءمالىم ەتتى.

- بيىل ءبىرىنشى جارتىجىلدىقتا 250 مىڭ ازامات جۇمىسقا ورنالاستى، ونىڭ ىشىندە 134 مىڭ ادام تۇراقتى ەڭبەكپەن قامتىلدى. سول سياقتى ۇلتتىق جوبالار مەن سالالىق تۇجىرىمدامالار اياسىندا 4,6 مىڭعا جۋىق ازامات جۇمىسپەن قامتىلدى. مەملەكەت باسشىسىنىڭ «10 مىڭ ادامعا شاققاندا 100 جاڭا جۇمىس ورنى» باستاماسى اياسىندا شامامەن 63 مىڭ ادام، جۇمىس بەرۋشىلەر ۇسىنعان بوس جۇمىس ورىندارىنا 67 مىڭ ادام، جۇمىسپەن قامتۋعا جاردەمدەسۋدىڭ بەلسەندى شارالارى اياسىندا 116 مىڭنان استام ادام جۇمىسقا ورنالاستى، - دەدى اسقار بياحمەتوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سونداي-اق ۆيتسە-مينيستر جىل سوڭىنا دەيىن 480 مىڭ ادامدى جۇمىسقا ورنالاستىرۋ جوسپارى تۋرالى ايتتى.

- مينيسترلىكتىڭ اقپاراتتىق جۇيەسى ارقىلى مىندەتتى زەينەتاقى جارناسى بار ازاماتتاردىڭ جۇمىسقا ورنالاسۋىنا مونيتورينگ جۇرگىزىلىپ جاتىر. ەندى جۇمىسپەن قامتىلعاندار قاتارىنا تەك مىندەتتى زەينەتاقى جارناسى بار ازاماتتار عانا ەنگىزىلەدى، - دەيدى ءمينيستردىڭ ورىنباسارى.

بۇعان دەيىن 4 كۇندىك جۇمىس اپتاسى جاعدايىندا قازاقستاندىقتاردىڭ جالاقىسى قالاي ەسەپتەلەتىنى تۋرالى جازعان ەدىك.