زاڭسىز كوشى-قونمەن كۇرەس ەۋروپالىق ساياسي قوعامداستىقتىڭ سامميتىندە باستى تاقىرىپقا اينالدى

  استانا. KAZINFORM -انگليانىڭ وكسفوردشير وكرۋگىندەگى بلەنحەيم سارايىندا وتكەن ەۋروپالىق ساياسي قوعامداستىق ءسامميتىنىڭ نەگىزگى تالقىلاۋ تاقىرىبى زاڭسىز يمميگراتسياعا قارسى كۇرەس بولدى.

«ءبىز باندىلاردى (ادام كونترابانداشىلارى - رەد. ) جەڭەمىز، ولاردىڭ بيزنەس ۇلگىسىن وزگەرتەمىز جانە شەكارامىزدى بەكىتەمىز»، - دەدى ۇلى بريتانيا پرەمەر- ءمينيسترى كير ستارمەر باسپا ءسوز ءماسليحاتىندا.

ول ۇلى بريتانيانىڭ ەۋروپالىق وداقتىڭ Europol پوليسيا قىزمەتىمەن ىنتىماقتاستىعىن نىعايتىپ، سلوۆاكيا، سلوۆەنيا سياقتى ەلدەرمەن كوشى-قون سالاسىندا جاڭا ىنتىماقتاستىق كەلىسىمدەرىن جاسايتىنىن اتاپ ءوتتى.

«ءبىز ەۋروپالىق سەرىكتەستەرىمىزبەن باندىلاردى بيزنەستەن شىعارۋ ءۇشىن بارلاۋ جۇمىستارىن جۇرگىزەتىن بولامىز»، - دەپ قوستى ستارمەر.

زاڭسىز كوشى- قوننىڭ تۇپكى سەبەبىن جويۋ ءۇشىن ۇلى بريتانيا پرەمەر-ءمينيسترى افريكا مەن تاياۋ شىعىستاعى گۋمانيتارلىق جانە ءبىلىم بەرۋ جوبالارىن جۇزەگە اسىرۋعا 84 ميلليون فۋنت ستەرلينگ بولەتىنىن حابارلادى.

«بۇل گۋمانيتارلىق جانە مەديتسينالىق قولداۋدى، بىلىكتىلىكتى ارتتىرۋدى، جۇمىسقا ورنالاسۋعا جاردەمدەسۋدى جانە بىلىمگە قولجەتىمدىلىكتى قامتيدى. «بۇل كوشى- قون داعدارىسىن ەڭسەرۋدىڭ ماڭىزدى بولىگى»، - دەدى ۇلىبريتانيا ۇكىمەتىنىڭ باسشىسى.

ەۋروپالىق ساياسي قوعامداستىقتىڭ سامميتى - 2022 -جىلى فرانسيا پرەزيدەنتى ەممانۋەل ماكروننىڭ باستاماسىمەن ەۋروپانىڭ بولاشاعىن تالقىلاۋ ءۇشىن قۇرىلعان حالىقارالىق فورۋم. وسى ءتورتىنشى سامميتكە 35 تەن استام مەملەكەت جانە ۇكىمەت باسشىلارى قاتىستى.

كەلەسى سامميت قاراشا ايىندا ۆەنگريادا، ال 2025 -جىلى البانيا مەن دانيادا وتەدى.