يزرايلدىڭ گازا سەكتورىنداعى مەكتەپكە جاساعان سوققىسىنان 18 ادام، ونىڭ ىشىندە 6 ب ۇ ۇ قىزمەتكەرى قازا تاپتى
استانا. KAZINFORM - سارسەنبى كۇنى گازا سەكتورىنىڭ ورتالىق بولىگىندەگى نۋسەيرات بوسقىندار لاگەرىندەگى مىڭداعان پالەستينالىقتار باسپانا رەتىندە پايدالاناتىن مەكتەپكە شابۋىل جاسالىپ، 18 ادام، ونىڭ ىشىندە بىرىككەن ۇلتتار ۇيىمىنىڭ تاياۋ شىعىستاعى پالەستينالىق بوسقىندار جونىندەگى اگەنتتىگىنىڭ التى قىزمەتكەرى قازا تاپتى، دەپ جازادى AlJazeera.
سوققى نۋسەيرات بوسقىندار لاگەرىندەگى ءال-جاۋني مەكتەبىنە جاسالعان. كۋاگەرلەردىڭ ايتۋىنشا، قازا تاپقاندار اراسىندا لاگەردە جاسىرىنعان پالەستينالىق ايەلدەر مەن بالالار دا بار. سونداي-اق ب ۇ ۇ-نىڭ تاياۋ شىعىستاعى پالەستينالىق بوسقىندارعا كومەك كورسەتۋ جونىندەگى اگەنتتىگىنىڭ (ب ا پ و ر) التى قىزمەتكەرى، سونىڭ ىشىندە ب ا پ و ر-دىڭ باسپانا مەنەدجەرى مەن قونىس اۋدارعاندارعا كومەكتەسەتىن توپتىڭ باسقا مۇشەلەرى دە قازا تاپتى.
- بۇل وقيعا ءبىزدىڭ قىزمەتكەرلەر ەڭ كوپ قازا تاپقان سوققى بولدى، - دەپ حابارلادى ب ا پ و ر.
ب ۇ ۇ اگەنتتىگىنىڭ مالىمەتىنشە، سوعىس باستالعالى اتالمىش مەكتەپكە 5 رەت شابۋىل جاسالعان. ونى 12 مىڭعا جۋىق بوسقىن، اسىرەسە بالالار مەن ايەلدەر پانالادى.
ب ا پ و ر قاقتىعىسقا قاتىسۋشى بارلىق تاراپتاردى ەشقاشان مەكتەپتەردى نەمەسە ولاردىڭ ماڭىنداعى اۋماقتاردى اسكەري نەمەسە جاۋىنگەرلىك ماقساتتا پايدالانباۋعا شاقىردى. مالىمدەمەدە مەكتەپتەر مەن باسقا دا ازاماتتىق ينفراقۇرىلىمدار ءارقاشان قورعالۋى كەرەك جانە نىسانا ەمەس ەكەنى اتاپ كورسەتىلدى.
- گازادا ەشكىم قاۋىپسىز ەمەس. ەشكىمدى ايامايدى، - دەلىنگەن Х الەۋمەتتىك جەلىسىندەگى ب ا پ و ر مالىمدەمەسىندە.
يزرايل قورعانىس كۇشتەرى مەكتەپ اۋماعىندا كوماندالىق ورتالىق قۇرعان جانە سول جەردەن شابۋىلدار جوسپارلاعان حاماس سودىرلارىن نىساناعا العانىن ايتىپ، بەيبىت تۇرعىنداردى قورعاۋ ءۇشىن شارالار قابىلداعانىن حابارلادى.
- بەيبىت تۇرعىندارعا زيان كەلتىرۋ قاۋپىن ازايتۋ ءۇشىن كوپتەگەن شارالار قابىلداندى، سونىڭ ىشىندە جوعارى دالدىكتەگى وق-دارىلەردى پايدالانۋ، اۋە باقىلاۋى جانە قوسىمشا بارلاۋ، - دەدى يزرايل قورعانىس كۇشتەرى.
يزرايل اسكەريلەرى حاماس- تى پالەستينالىق بەيبىت تۇرعىنداردى ءتىرى قالقان رەتىندە پايدالاندى دەپ ايىپتايدى، ال حاماس ونى جوققا شىعارادى.
ب ۇ ۇ باس حاتشىسى انتونيۋ گۋتەرريش مەكتەپكە جاسالعان شابۋىلدى حالىقارالىق گۋمانيتارلىق قۇقىقتى ورەسكەل بۇزۋ دەپ اتاپ، ولاردى دەرەۋ توقتاتۋدى تالاپ ەتتى.
- گازادا بولىپ جاتقان جاعداي مۇلدە اقىلعا قونىمسىز، - دەدى گۋتەرريش.
ب ۇ ۇ وكىلى ستەفان ديۋجارريك بۇل گازاداعى سوعىس باستالعاننان بەرگى گازانىڭ ورتالىعىنداعى نۋسەيرات بوسقىندار لاگەرىندەگى ءبىر مەكتەپكە جاسالعان بەسىنشى اۋە شابۋىلى ەكەنىن ايتتى.
- ءبىز بەيبىت تۇرعىندارعا، سونداي-اق ب ۇ ۇ نىساندارىنا باعىتتالعان بارلىق اۋە شابۋىلدارىن ايىپتايمىز، - دەدى ديۋجارريك.
گازا سەكتورىنداعى سوعىس 2023 -جىلى 7-قازاندا حاماس يزرايلگە شابۋىل جاساپ، يزرايلدىڭ باعالاۋى بويىنشا 1200 ادامدى ءولتىرىپ، 250-گە جۋىق ادامدى كەپىلگە العان كەزدە باستالدى. يزرايلدىڭ گازا سەكتورىنا جاساعان كەيىنگى شابۋىلى انكلاۆتىڭ دەنساۋلىق ساقتاۋ مينيسترلىگىنىڭ مالىمەتىنشە، 41000-نان استام پالەستينالىقتاردىڭ ءومىرىن قيدى.
اۆتور
ەركەجان سماعۇلوۆا