ەگىزدىڭ سىڭارىن اۋەجايدا قالدىرىپ كەتكەن: Air Astana بەس ميلليون تەڭگە مورالدىق شىعىن وتەيدى
استانا. KAZINFORM - بيىل جازدا FlyArystan اۋە كومپانياسىنىڭ قىزمەتكەرلەرى استانادان ورال قالاسىنا جولعا شىققان ەگىز ءجاسوسپىرىمنىڭ ءبىرىن اۋەجايدا قالدىرىپ كەتكەن.
بۇل تۋرالى ەگىزدىڭ اناسى جازيرا مۋسينا ءوزىنىڭ الەۋمەتتىك پاراقشاسىنا جازىپ، ارتى شۋعا اينالعان ەدى.
«سوت Air Astana اۋە كومپانياسىنا زەرەنىڭ اناسىنا 5000000 تەڭگە كولەمىندە مورالدىق شىعىن وتەۋگە مىندەتتەدى»، - دەپ جازدى ەگىزدىڭ اناسى جازيرا مۋسينانىڭ ادۆوكاتى جەلىدەگى ءدانىلحان شاعاتايەۆ جەكە پاراقشاسىندا.
ادۆوكاتتىڭ ايتۋىنشا، اۋە كومپانياسى باستاپقىدا شاعىمعا ءاتۇستى قاراعان، ىسكە قوعامدىق نارازىلىقتان كەيىن ءمان بەرگەن.
«بۇل ءبىرىنشى جاعداي ەمەس، سوندىقتان ءبىز كامەلەتكە تولماعان جولاۋشىلاردىڭ قۇقىقتارىن قامتاماسىز ەتۋدە ناقتى وزگەرىستەرگە قول جەتكىزۋ ءۇشىن سوڭىنا دەيىن بارۋعا شەشىم قابىلدادىق. قازىر كوميتەت تۇزەتۋلەر بويىنشا جۇمىس ىستەپ جاتىر»، - دەيدى ول.
ەسكە سالساق، كەلەڭسىز جايت بيىل تامىزدا بولعان ەدى. ورال قالاسىنىڭ قوس تۇرعىندارى ەگىز - زاۋرە مەن زەرە امەريكاداعى ءتىل مەكتەبىنەن استانا ارقىلى كەرى ۇشىپ شىققان. ەلورداعا امان جەتكەن قوس ءجاسوسپىرىمنىڭ ءبىرى استانا - ورال باعىتىندا ۇشقان «FlyArystan» اۋەكومپانياسىنىڭ ۇشاعىنان قالىپ قويعان.
كەيىن FlyArystan باسشىسى ورالدا ەگىزدەردىڭ اناسى جازيرا مۋسينامەن كەزدەستى.
اراعا ۋاقىت سالىپ FlyArystan باسشىسى بالانىڭ اۋەجايدا قالىپ قويۋ وقيعاسىنا قاتىستى كەشىرىم سۇرادى.