يتاليا ساحناسىنداعى قازاق قىزى: ايگەرىم التىنبەك «لا سكالادا» ونەر كورسەتپەك

استانا. KAZINFORM - ايگىلى يتالياندىق وپەرا ساحناسى «لا سكالادا» قازاقستاندىق ءانشى ونەر كورسەتپەك. تانىمال تەاتردا تاعىلىمدامادان وتەتىن ايگەرىم التىنبەك Jibek Joly ارناسىنىڭ «بۇگىن LIVE» ستۋدياسىنا قوناق بولدى.

- مەن ءۇش جىلدان بەرى يتاليادا تۇرىپ، ءبىلىم الىپ جاتىرمىن. «لا سكالا» تەاترىنا ءتۇسۋ - مەنىڭ ارمانىم بولاتىن. يتالياعا كەلۋىمنىڭ باستى سەبەبى دە وسى. ءبىراق بۇل وڭاي بولعان جوق. «لا سكالا» تەاترىنىڭ اكادەمياسىنا تىكەلەي بارىپ وقۋعا قابىلدانۋ مۇمكىن ەمەس. ەڭ الدىمەن، يتاليان ءتىلىن جاقسى مەڭگەرۋ قاجەت. سونداي-اق، كونسەرۆاتوريالار مەن اكادەميالاردا الدىن الا ءبىلىم الۋ كەرەك. بۇل تالاپتار ولار ءۇشىن وتە ماڭىزدى، - دەيدى وپەرا ءانشىسى.

قازاقستاندىق ارۋ ءوز ارمانىنا جەتۋ ءۇشىن يتاليادا كونسەرۆاتوريا دا وقىعان.

- بيىل پارما قالاسىنداعى ارريگو بويتو اتىنداعى كونسەرۆاتوريانى اياقتادىم. بۇل - يتالياداعى ەڭ العاشقى كونسەرۆاتوريالاردىڭ ءبىرى. مۇندا ءتۇسۋ دە، وقۋ دا وڭاي بولمادى. بارلىق وقۋ باعدارلامالارى يتاليان تىلىندە وتەدى. ءبىلىم بەرۋ جۇيەسىنىڭ دارەجەسى وتە جوعارى، ساباق بارىسى كۇردەلى، - دەيدى ول.

ايگەرىم التىنبەكتىڭ ايتۋىنشا، وعان يتاليان ءتىلىن ۇيرەنۋ اسا قيىنعا سوقپاپتى.

- مەنىڭ يتاليان تىلىنە دەگەن قىزىعۋشىلىعىم جوعارى بولعان سەكىلدى. ويتكەنى ءبىزدىڭ ورىنداپ جۇرگەن كوپتەگەن شىعارمالارىمىز يتاليان تىلىندە. سول شىعارمالاردى ورىنداماس بۇرىن مىندەتتى تۇردە ماتىندەرىن جاتتاپ، اۋدارماسىن جاساۋ كەرەك بولدى. وسىلايشا، ءتىلدى ۇيرەنۋگە قاجەتتى بازا قالىپتاستى. كەيىن گرامماتيكانى تەرەڭدەتۋ ءۇشىن قازاقستاندا 2-3 اي دايىندالدىم. سودان كەيىن كونسەرۆاتورياعا ءتۇسۋ ءۇشىن ەمتيحاندارىمدى تاپسىردىم. ءبىراق تەوريانى وقىعانىڭ ءبىر باسقا، ال يتاليالىقتارمەن يتاليانشا سويلەسۋ - مۇلدە باسقا دۇنيە، - دەيدى ءانشى.

ستۋديا قوناعى «لا سكالا» تەاترىنىڭ اكادەمياسىنا ءتۇسۋ وڭاي بولماعانىن ايتادى.

- «لا سكالا» تەاترىنىڭ اكادەمياسىنا ءتۇسۋ ءۇشىن ءۇش جىل بويى تىڭعىلىقتى دايىندالدىم. تاعىلىمدامام ەكى جىلعا جوسپارلانعان. العاشقى ىرىكتەۋ كەزەڭىنە 400 دەن اسا ادام قاتىستى. سولاردىڭ ىشىنەن 90 ادام جاندى تىڭدالىمعا ءوتتى. كەيىن جارتىلاي فينالعا جولداما بەرىلدى. جارتىلاي فينال ەكى بولىمنەن تۇردى. ءبىرىنشى بولىمدە كامەرالىق مۋزىكا مەن اريالار ورىندادىق. ال ەكىنشى بولىمدە اكتەرلىك جانە مۋزىكالىق قابىلەتىمىز تەكسەرىلىپ، سۇحبات وتكىزىلدى. سوڭعى كەزەڭ - «لا سكالا» ساحناسىندا ءوتتى. قورىتىندىسىندا 400 ادامنىڭ ىشىنەن 12 ادام عانا تاڭدالىپ الىندى، - دەيدى ايگەرىم.

وپەرا ءانشىسى قازاق كلاسسيكالىق ءان ونەرىن الەمگە تانىتقىسى كەلەتىنىن جەتكىزدى.

- الەۋمەتتىك جەلىلەردە كوپ ادام مەنى ديماشپەن سالىستىرىپ جاتىر. وسى تۇستا ايتقىم كەلەدى، ديماش - قازاقتىڭ ەسترادا جانرىن الەمگە تانىتىپ ءجۇر. ال مەن كلاسسيكالىق باعىتتا ەلىمدى تانىتقىم كەلەدى، - دەيدى ستۋديا قوناعى.

ەسكە سالا كەتەيىك، ايگەرىم التىنبەك وتكەن جولى Kazinform اگەنتتىگىنە بەرگەن سۇحباتىندا «ونەر ادامدارى حالىقتى مادەنيەتكە تاربيەلەيدى» دەگەن پىكىر بىلدىرگەن ەدى.