ىستانبۇلداعى رەسەي مەن ۋكراينا كەلىسسوزى اياقتالدى: قورىتىندىلار، كەلىسپەۋشىلىكتەر جانە جاڭا باستامالار

استانا. KAZINFORM - ىستانبۇلدا رەسەي مەن ۋكراينا دەلەگاتسيالارىنىڭ ەكى ساعاتقا سوزىلعان كەزدەسۋى اياقتالدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

تۇركيانىڭ سىرتقى ىستەر مينيسترلىگىنە سىلتەمە جاساعان تۇرىك ب ا ق- تارىنىڭ حابارلاۋىنشا تاراپتاردىڭ كەزدەسۋى اياقتالدى. كەلىسسوزدەر جابىق ەسىك جاعدايىندا ءوتتى، سوندىقتان ناقتى كەلىسىم جاريالانعان جوق.

كەزدەسۋدىڭ باسىندا تۇركيا سىرتقى ىستەر مينيسترلىگىنىڭ باسشىسى حاكان فيدان بولدى. ونىڭ قاتىسۋى اشىلۋ سوزىمەن شەكتەلدى. ودان كەيىن رەسەي جانە ۋكراينا دەلەگاتسيالارى دەلدالسىز تالقىلاۋدى جالعاستىردى.

دەلەگاتسيالار اراسىنداعى قارىم-قاتىناس تىلىنە قاتىستى دا كەيبىر بەلگىسىزدىك بار. كەيبىر ب ا ق تاراپتاردىڭ اۋدارماشى ارقىلى سويلەسكەنىن جازسا، باسقالارى كەلىسسوزدەر ورىس تىلىندە جۇرگىزىلگەنىن ايتادى.

Reuters اگەنتتىگىنىڭ حابارلاۋىنشا، رەسەيدىڭ قويعان تالاپتارى شەكتەن تىس جانە بۇرىنعى كەلىسسوزدەردەن الشاق. بۇل ەلدەر اراسىنداعى الاۋىزدىقتىڭ ساقتالۋىنا اكەلۋى مۇمكىن.

ۋكراينا پرەزيدەنتى ۆلاديمير زەلەنسكي ءوزىنىڭ جاڭا جولداۋىندا كەلىسسوزدەر ناقتى ىلگەرىلەۋسىز «تەاتر» بولىپ شىقسا، رەسەيگە قارسى سانكسيالىق قىسىمدى كۇشەيتۋگە شاقىردى.

سونىمەن بىرگە، ىستانبۇل كەزدەسۋىنىڭ ناتيجەسىنە قاتىستى بەلگىسىزدىك جاعدايىندا ريم پاپاسى ليەۆ XIV ۆاتيكاندى كەلىسسوزدەردىڭ كەلەسى راۋندى ءۇشىن بەيتاراپ ورىن رەتىندە ۇسىنۋعا دايىن ەكەنىن مالىمدەدى. بۇل باستاما ەۋروپانىڭ ءبىرقاتار ەلىندە ديالوگتى جالعاستىرۋدىڭ ءتاسىلى رەتىندە قولداۋ تاپتى.

تىكەلەي كەلىسسوزدەردىڭ قايتا جاندانعانىنا قاراماستان، رەتتەۋدىڭ كەلەشەگى بەلگىسىز جانە تاراپتاردىڭ ۇستانىمدارى ءبىر-بىرىنەن الشاق قالىپ وتىر.

بۇعان دەيىن تۇركيا سىرتقى ىستەر مينيسترلىگىنىڭ باسشىسى حاكان فيدان رەسەي مەن ۋكراينا اراسىنداعى رەتتەۋ جولىن تاڭداۋ تاراپتاردىڭ ەركىندە ەكەنىن مالىمدەگەن.