يران يزرايل سوققىسىنان جوعارى اسكەري قولباسشىلارى مەن جەتەكشى عالىمدارى قازا تاپقانىن راستادى

استانا. KAZINFORM - يران بيلىگى يزرايلدىڭ تەگەرانعا جانە ەلدىڭ باسقا ايماقتارىنا تۇندە جاساعان سوققىلارىنان ءبىرقاتار نەگىزگى اسكەري جانە ازاماتتىق قىزمەتكەرلەردىڭ قازا تاپقانىن رەسمي تۇردە راستادى، دەپ حابارلايدى Kazinform ءتىلشىسى.

قازا تاپقاندار اراسىندا يران قارۋلى كۇشتەرى باس شتابىنىڭ باسشىسى گەنەرال-مايور موحامماد باگەري، يسلام رەۆوليۋتسياسى ساقشىلار كورپۋسىنىڭ قولباسشىسى گەنەرال-مايور حوسەين سالامي جانە حاتام ءال-انبيا شتابىنىڭ قولباسشىسى گەنەرال-مايور گوليامالي راشيد بار. ولاردىڭ جەكەلەگەن اۋە شابۋىلدارى كەزىندە قازا تاپقانىن IRNA مەملەكەتتىك اقپارات اگەنتتىگى راستادى.

سونداي-اق قازا تاپقاندار اراسىندا ەكى كورنەكتى يراندىق يادرولىق عالىم: يسلام ازاد ۋنيۆەرسيتەتىنىڭ پرەزيدەنتى موحامماد-مەحدي تەحرانچي جانە يران اتوم ەنەرگياسى ۇيىمىنىڭ بۇرىنعى باسشىسى فەرەيدۋن ابباسي بار. ولار تەگەراننىڭ تۇرعىن اۋداندارىنا باعىتتالعان سوققىلاردان قازا تاپقانى حابارلاندى.

يراننىڭ مەملەكەتتىك تەلەارناسى شابۋىلدا رۋحاني كوسەم اياتوللا ءالي حامەنەيدىڭ كەڭەسشىسى ءالي ءشامحانيدىڭ دە جارالانعانىن حابارلادى.

- بۇگىنگى سيونيستىك رەجيمنىڭ شابۋىلىنان جوعارى مارتەبەلى جەتەكشىنىڭ كەڭەسشىسى ءالي شامحاني جارالاندى، - دەلىنگەن مالىمدەمەدە.

يزرايل جۇماعا قاراعان ءتۇنى تەگەران مەن باسقا قالالارداعى نىسانداردى سوققىعا جىققان جاپپاي شابۋىلدار سەرياسىن جاسادى.

IRNA حابارلاعانداي، نىسانالاردىڭ قاتارىندا تۇرعىن اۋداندار دا بولدى. مەملەكەتتىك تەلەارنا تىلشىلەرى ۇيىندىلەر اراسىنان ايەلدەر مەن بالالاردىڭ مۇردەسى تابىلعانىن حابارلادى.

- قولباسشىلىق پەن عالىمداردىڭ قازاسى يران اسكەرى دە، حالقى دا كەشىرمەيتىن شىعىن. مۇنىڭ سالدارىن يزرايل كوتەرەدى، - دەدى يران قاۋىپسىزدىك كۇشتەرى.

يران ۇكىمەتىنىڭ رەسمي وكىلى بۇل ەلدىڭ سوققىلاردى تىكەلەي باسقىنشىلىق ارەكەتى دەپ سانايتىنىن جانە وعان «جان-جاقتى جانە پروپورتسيونالدى ەمەس» جاۋاپ ازىرلەپ جاتقانىن اتاپ ءوتتى. اۋە شابۋىلىنا قارسى قورعانىس جۇيەلەرى تولىق دايىندىقتا، ەلدە ۇلتتىق ازا تۇتۋ جاريالاندى.

حالىقارالىق ۇيىمدار مەن ءبىرقاتار مەملەكەتتەر سابىرعا شاقىردى. ب ۇ ۇ باس حاتشىسى انتونيۋ گۋتەرريش شيەلەنىستى دەرەۋ توقتاتۋعا جانە اۋقىمدى ايماقتىق قاقتىعىستى بولدىرماۋعا شاقىردى.

ايتا كەتەيىك، جۇما كۇنى تۇندە يزرايل يران اۋماعىنا جاپپاي سوققى بەردى. بۇعان جاۋاپ رەتىندە تەگەران يزرايلگە قاراي جۇزدەن استام درون ۇشىردى.

سونداي-اق، يزرايلدىڭ يرانعا سوققى بەرۋىنەن كەيىن مۇناي باعاسى كۇرت كوتەرىلدى.