يران مەن يزرايل اراسىنداعى ۇزدىكسىز سوققىدان تاعى بىرنەشە ادام قازا تاپتى

استانا. KAZINFORM - يران مەن يزرايل اراسىنداعى ۇزدىكسىز سوققىدان تاعى قانشا ادام قۇربان بولدى. دۇيسەنبىگە قاراعان ءتۇنى يزرايلدىڭ ورتالىق جانە سولتۇستىگىندەگى شابۋىلداردان كەمىندە سەگىز ادام قازا تاۋىپ، تاعى 300 گە جۋىق ادام جارالاندى، دەپ حابارلايدى Kazinform مەنشىكتى ءتىلشىسى.

يزرايل توتەنشە جاعدايلار قىزمەتىنىڭ حابارلاۋىنشا، يراننىڭ پەتاح تيكۆا، حايفا جانە بنەي-براك اۋداندارىنا جاسالعان زىمىران شابۋىلىنان ءۇش ايەل مەن بەس ەر ادام، ونىڭ ىشىندە قارت ادامدار قازا تاپتى. حايفا قالاسىندا ءۇيىندى استىنان ءۇش ءمايىت تابىلعان.

- ۇشەۋى دە ستراتەگيالىق ماڭىزدى نىساندا جۇمىس ىستەگەن. ءبىز ونى كوپتەن بەرى تۇرعىن اۋداننان كوشىرۋ كەرەك دەپ ەسەپتەپ جۇرگەنبىز، - دەدى يون ياحاۆ قالاسىنىڭ مەرى يزرايلدىڭ 12 ارناسىنا بەرگەن سۇحباتىندا.

يزرايل بيلىگى قازا تاپقانداردىڭ جالپى سانى 287، ونىڭ ىشىندە اينەك سىنىقتارىنان جاراقات العان بالالار دا بار دەپ مالىمدەدى. شنايدەر بالالار اۋرۋحاناسىندا ەكى ناۋقاستىڭ جاعدايى ورتاشا اۋىر، تاعى ءبىر ەرەسەك ادامنىڭ جاعدايى اۋىر. قالعاندارى جەڭىل جاراقات العاندار.

ساحال تۇنگى شابۋىل كەزىندە يزرايلگە شامامەن 40 بالليستيكالىق زىمىران اتىلعانىن حابارلادى. جۇما كۇنى قاقتىعىس باستالعاننان بەرى يران 350-گە جۋىق زىمىران ۇشىردى، ونىڭ 24- ى ادام شىعىنىنا سەبەپشى بولدى، دەپ حابارلايدى يزرايل قورعانىس كۇشتەرى.

سونداي-اق يزرايل اسكەرى Sa'ar 6 كلاستى كورۆەتتەردە ورنالاستىرىلعان BARAK MX جاڭا اۋە قورعانىسى جۇيەسىن پايدالانا وتىرىپ، تەڭىز ۇستىندە سەگىز ۇشقىشسىز ۇشاقتى ۇستاعانىن حابارلادى. يەمەن اۋماعىنان ۇشىرىلعان تاعى ءبىر زىمىران يزرايل شەكاراسىنا جەتپەي قۇلاپ، اشىق جەرگە قوندى.

وسىنىڭ اياسىندا يزرايلدىڭ قورعانىس ءمينيسترى يسراەل كاتس تەگەران «جاقىن ارادا قۇنىن تولەيتىنىن» ايتتى.

يزرايلدىڭ يران جەرىنە اۋە شابۋىلدارى جالعاسىپ جاتىر. ساحال يزرايل اۋە كۇشتەرى تەگەرانداعى «كۋدس» كۇشتەرىنىڭ كوماندالىق ورتالىقتارىنا سوققى بەرگەنىن حابارلادى.

يراننىڭ Tasnim اقپارات اگەنتتىگىنىڭ حابارلاۋىنشا، زەندجان پروۆينسياسىنداعى سوققىدان يسلام ريەۆوليۋتسياسى ساقشىلار كورپۋسىنىڭ قولباسشىسى رەزا نادجافي مەن سارباز حاسان راسۋلي قازا تاپقان. يزرايلدىڭ جۇمادان بەرى يرانعا جاساعان سوققىلارىنان بارلىعى 220-دان استام ادام، سونىڭ ىشىندە ايەلدەر، بالالار جانە جوعارى لاۋازىمدى اسكەريلەر قازا تاپتى.

بۇعان قوسا، يران جەكسەنبى كۇنى يزرايلدىڭ «موسساد» بارلاۋ اگەنتتىگىنە تىڭشىلىق جاساعانى ءۇشىن كىنالى دەپ تانىلعان ادامدى ءولىم جازاسىنا كەستى. ول ەسمايل فەكري بولاتىن. بۇل سوڭعى اپتالاردا تىڭشىلىق جاسادى دەگەن ايىپپەن ورىندالعان ءۇشىنشى ءولىم، دەپ حابارلايدى يراندىق ب ا ق.

ا ق ش پرەزيدەنتى دونالد ترامپ شيەلەنىسكە الاڭداۋشىلىق ءبىلدىردى جانە تاراپتاردى شيەلەنىستى ازايتۋعا شاقىرىپ، «كەلىسىمنەن ۇمىتتەنەتىنىن» ايتتى، ءبىراق امەريكا قۇراما شتاتتارى يزرايلدى قولداۋدى جالعاستىرادى دەپ سەندىردى.

يزرايل قورعانىس كۇشتەرى تاعى دا حالىقتى ىشكى مايدان قولباسشىلىعىنىڭ نۇسقاۋلارىن ورىنداپ، اۋە شابۋىلى سيرەنالارى ەستىلگەن كەزدە جاسىرىنۋعا شاقىردى، اسىرەسە يراننىڭ اتقىلاۋىنىڭ نەگىزگى نىساناسى سانالاتىن تەل- اۆيۆ، حايفا جانە بير-شەبا اۋداندارىندا.

ءبىر كۇن بۇرىن يزرايلدىڭ ا ق ش- تى يرانمەن سوعىسۋعا شاقىرعانى تۋرالى اقپارات تاراعان بولاتىن.

سونىمەن بىرگە يزرايل يراننىڭ يادرولىق جوباسىنىڭ ينفراقۇرىلىمىنا سوققىلارىن اياقتاعانىن حابارلادى.

وسىعان دەيىن ترامپتىڭ يزرايل مەن يران اراسىندا بەيبىتشىلىك ورناتۋعا ۋادە بەرگەنى تۋرالى جازدىق.

اۆتور

ەركەجان سماعۇلوۆا