يران ەكى بانكتىڭ اقپاراتتىق جۇيەسىنە كيبەرشابۋىل جاسالعانىن حابارلادى
استانا. KAZINFORM - يراننىڭ كيبەرقورعانىس باسقارماسى يزرايل ۇيىمداستىرعان كيبەرشابۋىلدارمەن كۇرەسۋگە ءماجبۇر بولعانىن مالىمدەدى، دەپ جازادى ازەرتادج.
اگەنتتىكتىڭ شەتەلدىك اقپارات قۇرالدارىنا سىلتەمە جاساي وتىرىپ حابارلاعانداي، بۇل شابۋىلدار ەلدەگى ەكى بانكتىڭ - Bank Sepah پەن Bank Pasargad تىڭ اقپاراتتىق جۇيەلەرىنىڭ ىستەن شىعۋىنا سەبەپ بولدى.
- ءبىزدىڭ كيبەرقاۋىپسىزدىك ماماندارىمىزدىڭ ارقاسىندا ءبىر بانكتىڭ جۇيەسىندەگى اقاۋ تەز ارادا جويىلدى. قازىرگى ۋاقىتتا ەكىنشى بانكتىڭ جۇيەسىن قالپىنا كەلتىرۋ جۇمىستارى جالعاسىپ جاتىر، - دەلىنگەن يراننىڭ كيبەرقورعانىس باسقارماسىنىڭ مالىمدەمەسىندە.
Press TV تەلەارناسىنىڭ حابارلاۋىنشا، يران تاراپى بۇل شابۋىلداردان كەيىن يزرايلگە قارسى جاۋاپ شارالارىن قولعا العان.
ايتا كەتەيىك، سەيسەنبى كۇنى يراننىڭ جەتەكشى مەملەكەتتىك بانكتەرىنىڭ ءبىرى Sepah Bank حاكەرلىك توپتىڭ اۋقىمدى كيبەرشابۋىلىنا ۇشىراپ، كليەنتتەرگە قىزمەت كورسەتۋ مەن بانكتىك جۇيەلەرگە قولجەتىمدىلىكتە ۇزىلىستەر بولدى.
سونىمەن قاتار يران بيلىگى حالىقتى WhatsApp قوسىمشاسىن جويۋعا شاقىردى. تەگەران تانىمال مەسسەندجەردى قولدانۋشىلاردىڭ دەرەكتەرىن جينادى دەپ ايىپتاپ وتىر، الايدا ناقتى دالەلدەر كەلتىرىلگەن جوق.
بۇگىن يراننىڭ بالليستيكالىق زىمىرانى يزرايلدىڭ بەەر- شيەۆا قالاسىنداعى «سوروكا» مەديتسينالىق ورتالىعىنا ءتيىپ، بەيبىت تۇرعىندار جاراقات الدى.
ال يزرايل اسكەري-اۋە كۇشتەرى يراننىڭ يادرولىق باعدارلاماسىنداعى نەگىزگى نىسان سانالاتىن اراكتاعى اۋىر سۋ رەاكتورىنا اۋەدەن سوققى بەردى.