وزبەكستانعا كيىك بەرۋ ماسەلەسى ءتيىستى دەڭگەيدە شەشىم قابىلداۋدى تالاپ ەتەدى - ەكولوگيا مينيسترلىگى

استانا. قازاقپارات  - 22 -شىلدەسىندە وزبەكستان رەسپۋبليكاسى ەكولوگيا، قورشاعان ورتانى قورعاۋ جانە كليماتتىڭ وزگەرۋى مينيسترلىگىنىڭ رەسمي رەسۋرسىندا وزبەكستان مەن قازاقستان اراسىندا كيىكتى ساقتاۋ سالاسىنداعى ءوزارا تۇسىنىستىك تۋرالى مەموراندۋمعا قول قويۋعا دايىندىق ءجۇرىپ جاتقانى تۋرالى حابارلانعان. بۇل تۋرالى ەكولوگيا مينيسترلىگى ءمالىم ەتتى.

- مەموراندۋم جوباسى جۇمىس تارتىبىمەن قازاقستان تاراپىنا ۇسىنىلدى جانە قازىرگى ۋاقىتتا قارالۋ ساتىسىندا تۇر. وسى ماسەلەنىڭ تابيعاتتى قورعاۋ ماڭىزدىلىعىن ەسكەرە وتىرىپ، مەموراندۋمنىڭ مازمۇنى ەكى ەلدىڭ جاۋاپتى عىلىمي مەكەمەلەرى مەن ۋاكىلەتتى مەملەكەتتىك ورگاندارىن تارتا وتىرىپ، پىسىقتاۋدى تالاپ ەتەتىنىن اتاپ وتكەن ءجون. سونىمەن قاتار، جانۋارلار دۇنيەسى وكىلدەرىن بەرۋ، سونداي-اق مەموراندۋم جاساسۋ ماسەلەلەرى مەملەكەتارالىق ساناتقا جاتادى جانە ءتيىستى دەڭگەيدە شەشىم قابىلداۋدى تالاپ ەتەدى، - دەلىنگەن حابارلامادا.

ەسكە سالا كەتەيىك، بۇعان دەيىن قازاقستان مەن وزبەكستان كيىك پوپۋلياتسياسىن ساقتاۋعا باعىتتالعان بەرلىسكەن مەموراندۋم قابىلداۋ مۇمكىندىگىن زەردەلەپ جاتقانىن جازعان ەدىك. وزبەكستان ەكولوگيا مينيسترلىگىنىڭ باسپا ءسوز قىزمەتى قازىرگى ۋاقىتتا قوس ەلدىڭ جاۋاپتى ۆەدومستۆولارى اراسىندا كەلىسسوز جۇرگىزىپ جاتقانىن راستاعان بولاتىن. قۇجاتتى بيىل تامىز ايىندا قابىلداۋ جوسپارلانعان.

مەموراندۋم اياسىنداعى كەلىسسوزدەردە وزبەك تاراپى قازاقستاننان شامامەن 500 كيىك لاعىن الىپ، ونى ءوز اۋماعىنا جەرسىندىرۋ باستاماسىن كوتەردى. مينيسترلىكتىڭ مالىمەتىنشە، ماماندار اقبوكەندەردىڭ وزبەكستان كليماتىنا بەيىمدەلۋىن زەرتتەمەك.