وڭتۇستىك كورەيانىڭ بۇرىنعى پرەزيدەنتىنىڭ ءىسى: سوت تىڭداۋىنا 2000 عا جۋىق پوليتسەي تارتىلادى
استانا. KAZINFORM - بەيسەنبى كۇنى پوليتسيا بۇرىنعى پرەزيدەنت يۋن سوك يەل-دى تۇتقىنداۋعا وردەر بەرۋ تۋرالى سوت تىڭداۋىندا زورلىق-زومبىلىققا جول بەرىلمەيتىنى تۋرالى مالىمدەدى، دەپ حابارلايدى Yonhap.
سەۋل پوليتسياسى قالانىڭ ورتالىق اۋماقتىق سوتى يۋن سوك يەلگە ونىڭ وتكەن جىلدىڭ جەلتوقسان ايىندا ەلدە اسكەري جاعداي جاريالاۋ جونىندەگى ءساتسىز ارەكەتىمەن بايلانىستى سوت تىڭداۋىن وتكىزەردەن ءبىر كۇن بۇرىن ەسكەرتۋ جاسادى.
وڭتۇستىك سەۋلدەگى سوت عيماراتىنىڭ ماڭىندا وردەر بويىنشا شەشىم جاريالانعانعا دەيىن شامامەن 2000 پوليتسيا قىزمەتكەرى جانە 350 گە جۋىق تەحنيكا، ونىڭ ىشىندە قورعانىس وكىلدەرىن جۇمىلدىرۋ جوسپارلانىپ وتىر.
- ءبىز جاعدايدى تۇراقتى باقىلاۋدا ۇستايمىز جانە نولدىك توزىمسىزدىك ساياساتىنا سايكەس، زاڭسىز كۇش كورسەتۋ اكتىلەرىنە قاتاڭ جاۋاپ قايتارامىز، - دەلىنگەن پوليتسيانىڭ مالىمدەمەسىندە.
مۇنداي شارالار قاڭتار ايىندا نارازىلىق بىلدىرۋشىلەر سەۋلدىڭ باتىس وكرۋگتىك سوتىنىڭ عيماراتىنا باسا-كوكتەپ كىرگەننەن كەيىن قابىلداندى. ول كەزدە سوت يۋن سوك يەلدى قاماۋدا ۇستاۋ مەرزىمىن ۇزارتۋ تۋرالى وردەر شىعارعان بولاتىن.
پوليتسيا زاڭسىز ارەكەتتەرگە قارسى بۇرىش باللوندارىن جانە باسقا دا قۇرالداردى قولداناتىنىن، سونداي-اق قۇقىق بۇزۋشىلاردى وقيعا ورنىندا ۇستايتىنىن مالىمدەدى.
سەۋلدىڭ ورتالىق وكرۋگتىك سوتى تىڭداۋ استانا ۋاقىتى بويىنشا سارسەنبى كۇنى ساعات 10:15 كە بەلگىلەنگەنىن حابارلادى. ەگەر وردەر بەرىلسە، ەكس-پرەزيدەنت ەكىنشى رەت قاماۋعا الىنادى.