وسى اپتادا ءار مەكتەپتە ۇستازدار مەن اتا-انالار بالا قاۋىپسىزدىگىن تالقىلايدى
استانا. KAZINFORM - قازاقستاندىق اتا-انالارمەن بالالاردىڭ قاۋىپسىزدىگىن قامتاماسىز ەتۋ ماسەلەلەرى تالقىلانادى.
23-27-قىركۇيەك ارالىعىندا ەلىمىزدىڭ بارلىق مەكتەپتەرىندە بالالاردىڭ قاۋىپسىزدىگىنە ارنالعان اتا-انالار جينالىسى وتەدى.
جينالىستا اتا-انالاردىڭ بالا ومىرىندەگى، سونداي- اق ونلاين كەڭىستىكتەگى قاۋىپسىزدىگىنە قاتىستى جاۋاپكەرشىلىگى تۋرالى ءسوز قوزعالادى.
اتا-انالارعا قاۋىپ-قاتەردى دەر كەزىندە قالاي انىقتاۋ جانە ولاردى بولدىرماۋ ءۇشىن قانداي شارالار قولدانۋ كەرەكتىگى تۋرالى قادامدىق ۇسىنىم بەرىلەدى.
ولاردىڭ ىشىندە - بالانىڭ مىنەز-قۇلقىن باقىلاۋ، الەۋمەتتىك جەلىلەردەگى بەلسەندىلىك مونيتورينگى، مەكتەپ ورتاسىنداعى قۇرداستارىمەن قارىم-قاتىناسى كىرەدى.
بۇدان بولەك، ماماندار بالامەن تۇراقتى قارىم-قاتىناس جاساۋدىڭ، اشىق ديالوگ ءۇشىن سەنىمدى ورتا قۇرۋدىڭ جانە اتا-انالاردىڭ بالاسىنىڭ ومىرىنە ۇدايى قاتىسۋىنىڭ ماڭىزىنا نازار اۋداردى.
«بالا قاۋىپسىزدىگى - اتا-انا، پەداگوگ، ءاربىر ەرەسەك ادام ءۇشىن باسىمدىققا يە بولۋى ءتيىس. بالامەن اشىق ديالوگ قۇرۋ، ونىڭ ومىرىنە ۇدايى قاتىسىپ وتىرۋ، سيفرلىق قۇرىلعىلاردى باقىلاۋ جانە بالامەن قاۋىپسىزدىك تاقىرىبىندا اڭگىمەلەسۋ - بۇل پروبلەمالاردىڭ الدىن الۋعا كومەكتەسەتىن نەگىزگى قادامدار. اتا-انانىڭ مىندەتى - بالانىڭ ءجۇرىس-تۇرىسىن باقىلاپ قانا قويماي، سونىمەن قاتار ءوز بالاسىمەن ونى ءارقاشان تىڭداۋعا جانە كومەكتەسۋگە دايىن ەكەنىن بىلدىرەتىن سەنىمدى قارىم-قاتىناس قالىپتاستىرۋ. بالا - بولاشاعىمىز، ولاردىڭ سالاماتتىلىعىن ساقتاۋ تىكەلەي بىزگە بايلانىستى»، - دەپ اتاپ ءوتتى ق ر وقۋ-اعارتۋ مينيسترلىگى بالا قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ەستەرىڭىزگە سالا كەتەيىك، بيىلعى وقۋ جىلىنان باستاپ ءبىلىم بەرۋ ۇيىمدارىندا اپتا سايىن سىنىپ ساعاتى اياسىندا «قاۋىپسىزدىك ساباقتارى» ءوتىپ ءجۇر.
ساباق كەزىندە ينتەرنەتتەگى تاۋەكەلدەن قورعانۋ، ءوزىن-ءوزى ساقتاۋ داعدىلارىن دامىتۋ جانە ءتۇرلى قاۋىپ-قاتەر جاعدايىندا دۇرىس ارەكەت ەتۋ تاقىرىپتارى قامتىلىپ جاتىر.
سونداي-اق بالالار مەن اتا-انالار جانە پەداگوگتەر ءۇشىن پسيحولوگيالىق، قۇقىقتىق جانە ادىستەمەلىك كەڭەس الۋعا بولاتىن پسيحولوگيالىق قولداۋ ورتالىقتارى اشىلدى.
ال بالالارعا جاسالعان قاتىگەزدىككە كۋا بولساڭىز، تاۋلىك بويى قىزمەت ەتەتىن «111» نومىرىنە حابارلاسۋعا بولادى.
اۆتور
جانات قاپالبايەۆا