وسكەمەندەگى ۋاقىتشا ۇستاۋ يزولياتورلارىندا سانيتارلىق تالاپتار ساقتالماعان - پروكۋراتۋرا
وسكەمەن. KAZINFORM - وسكەمەن قالاسىنىڭ پروكۋراتۋراسى ۋاقىتشا ۇستاۋ يزولياتورلارىنداعى ازاماتتار قۇقىقتارىنىڭ قانشالىقتى ساقتالعانىن تەكسەردى.
وسى جىلدىڭ باسىنان بەرى قىلمىستىق قۋدالاۋ ورگاندارى 138 ادامدى ۇستاپ، ولاردىڭ 97 سى ۋاقىتشا ۇستاۋ يزولياتورلارىنا قاماۋعا الىنعان. پروكۋرورلار سول مەكەمەلەردەگى تالاپتاردىڭ ساقتالماعانىن انىقتادى.
- «زاڭ جانە ءتارتىپ» رەسپۋبليكالىق اكسياسى اياسىندا ازاماتتاردىڭ، سونىڭ ىشىندە قوعامنان وقشاۋلانعان جاعدايدا جۇرگەندەردىڭ قۇقىقتارى مەن بوستاندىقتارىن قورعاۋعا باعىتتالعان كەشەندى ءىس-شارالار جۇرگىزىلىپ جاتىر. وسى باعىتتا پروكۋراتۋرا ۋاكىلەتتى ورگانداردىڭ ماماندارىن تارتا وتىرىپ، ۋاقىتشا ۇستاۋ يزولياتورىنداعى ازاماتتاردى ۇستاۋ جاعدايلارىنا جوسپارلى تەكسەرۋ جۇرگىزدى. تەكسەرۋ بارىسىندا سانيتارلىق-تۇرمىستىق تالاپتاردىڭ جانە ۇستاۋ رەجيمىنىڭ ساقتالۋىنا قاتىستى ءبىرقاتار زاڭبۇزۋشىلىق انىقتالدى، - دەلىنگەن اقپاراتتا.
قاداعالاۋ ءىس-شارالارىنىڭ ناتيجەسىندە جاۋاپتى لاۋازىمدى تۇلعالار تارتىپتىك جاۋاپكەرشىلىككە تارتىلدى.
ەسكە سالساق، وسىعان دەيىن باس پروكۋراتۋرا جانىنداعى قۇقىق قورعاۋ ورگاندارى اكادەمياسىنا قابىلداۋ جەڭىلدەيتىندىگى حابارلانعان.
اۆتور
تالعاتجان مۇحامەتبەك ۇلى