ورتالىق ازيانىڭ ەڭبەك ميگرانتتارى قازاقستاننان ءوز ەلدەرىنە 1 تريلليون تەڭگە اۋدارعان

استانا. KAZINFORM - پارلامەنت سەناتى قارجى جانە بيۋدجەت كوميتەتىنىڭ ءتوراعاسى سۇلتانبەك ماكەجانوۆ ەلگە سىرتتان كەلەتىن ەڭبەك ميگرانتتارىنىڭ سانىنداعى قايشىلىقتاردى اتادى.

- كولەڭكەلى ەكونوميكا ماسەلەسىن قاراستىرساق، جوعارعى اۋديتورلىق پالاتانىڭ اۋديتى ناتيجەسىندە، كولەڭكەلى ەكونوميكانىڭ كىرىس بولىگى بويىنشا بيۋدجەتكە اكەلەتىن جاناما شىعىن 74 ميلليارد تەڭگە بولعان.

مىسالى، ەلىمىزگە جاقىن ورنالاسقان ورتالىق ازياداعى ءۇش ەلدىڭ ازاماتتارى قازاقستاندا ءۇش جىلدا 136 ميلليارد تەڭگە تاپقان. الايدا ۇلتتىق بانكتىڭ مالىمەتى بويىنشا، وسى مەرزىم ارالىعىندا ولار ءوز ەلدەرىنە شامامەن 1 تريلليون تەڭگەگە جۋىق قاراجات اۋدارعانى انىقتالدى. بۇل كورسەتكىشتەر - كولەڭكەلى ءونىم نەمەسە كولەڭكەلى قىزمەتتىڭ ناقتى وندىرىلگەنىن كورسەتەتىن بىردەن-ءبىر بەلگىلەر، - دەدى سەناتور.

ونىڭ پايىمداۋىنشا، وسىنداي تاۋەكەلدەردى ازايتۋ ءۇشىن كولەڭكەلى ەكونوميكانى باعالاۋ تاسىلدەرىن جانە سالىق جەڭىلدىكتەرىنىڭ تيىمدىلىگىن باقىلاۋ ادىستەرىن مۇقيات قاراستىرۋ كەرەك.

ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي دەرەگىنە سەنسەك، قازاقستانعا ەڭبەك ميگرانتتارىن «ەكسپورتتايتىن» نەگىزگى ەلدەر مىنالار؛ قىتاي - 5054 ادام، وزبەكستان - 1926 ادام، تۇركيا - 1079 ادام، ءۇندىستان - 1078 ادام.