مينيسترلىكتىڭ باسپا ءسوز قىزمەتىنىڭ مالىمەتىنشە، مەكتەپتە بالالاردىڭ قۇقىقتارىن قورعاۋ كوميتەتىنىڭ، ءتيىستى اۋماقتىق ورگانداردىڭ جانە «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتىنىڭ وكىلدەرىنەن قۇرالعان مونيتورينگتىك توپ جۇمىس ىستەپ جاتىر.
- دەنساۋلىق ساقتاۋ مينيسترلىگىنىڭ اقپاراتىنا سايكەس، اس بلوگىندا سانيتاريالىق تالاپتاردىڭ بۇزىلعانى انىقتالدى. شەكتەۋ شارالارى ەنگىزىلىپ، وقيعانىڭ ءمان-جايىن انىقتاۋ جۇمىستارى جۇرگىزىلىپ جاتىر. وقۋ-اعارتۋ مينيسترلىگى ر ف م م ديرەكتورلار كەڭەسى مەن باسقارماسىنا تاماقتاندىرۋدى ۇيىمداستىرۋدى جانە سانيتاريالىق تالاپتاردىڭ ساقتالۋىن باقىلاۋدى كۇشەيتۋ، سونداي-اق وقۋشىلاردىڭ قاۋىپسىزدىگىن قامتاماسىز ەتۋ جونىندە نۇسقاۋ بەردى، - دەلىنگەن ۆەدومستۆو تاراتقان اقپاراتتا.
وقۋشىلاردىڭ قاۋىپسىزدىگىن جانە ءبىلىم بەرۋ پروتسەسىنىڭ ۇزدىكسىزدىگىن قامتاماسىز ەتۋ ءۇشىن وقۋ ۋاقىتشا قاشىقتان وقىتۋ فورماتىندا ۇيىمداستىرىلدى.
باسىم مىندەتتەر قاتارىندا وقۋشىلاردىڭ قاۋىپسىزدىگىن قامتاماسىز ەتۋ، قۇقىقتارىن قورعاۋ، وقيعانىڭ ءمان-جايىن جان-جاقتى انىقتاۋ جانە تەكسەرۋ ناتيجەلەرى بويىنشا قاجەتتى شارالار قابىلداۋ بار.
جاعداي ءتيىستى قىزمەتتەر مەن وقۋ-اعارتۋ مينيسترلىگىنىڭ باقىلاۋىندا. جۇمىس دەنساۋلىق ساقتاۋ مينيسترلىگىمەن بىرلەسىپ جۇرگىزىلۋدە.
ەسكە سالايىق، بۇعان دەيىن الماتىدا رەسپۋبليكالىق فيزيكا- ماتەماتيكا مەكتەبىنىڭ 47 وقۋشىسى جەدەل ىشەك ينفەكتسياسىنىڭ بەلگىلەرىمەن ەمحاناعا جاتقىزىلعانى بەلگىلى بولدى.
كەيىن ر ف م م اكىمشىلىگى وقۋشىلاردىڭ اۋرۋحاناعا تۇسۋىنە بايلانىستى تۇسىنىك بەردى. بۇگىندە مەكتەپ عيماراتى مەن مەكتەپ-ينتەرناتتا دەزينفەكتسيالاۋ جۇمىستارى جۇرگىزىلگەن. ال قر باس مەملەكەتتىك سانيتاريالىق دارىگەردىڭ قاۋلىسىنا سايكەس، مەكتەپ-ينتەرناتتىڭ جانە اس بلوگىنىڭ جۇمىسى ۋاقىتشا توقتاتىلعان. سونىمەن قاتار 14- 16-قازان ارالىعىندا مەكتەپ ساباقتارى ونلاين فورماتتا وتەدى.
بۇعان دەيىن 50 گە جۋىق وقۋشىنىڭ ۋلانۋىنا بايلانىستى قىلمىستىق ءىس قوزعالعانى انىقتالدى.