- ومان مەملەكەتى قازاقستانمەن اراداعى قارىم-قاتىناسقا ايرىقشا ءمان بەرەدى. 1992-جىلى ديپلوماتيالىق قاتىناستار ورناعان كەزدەن باستاپ ەلدەرىمىز دوستىققا، ءوزارا سىيلاستىققا جانە سىندارلى ءوزارا ءىس-قيمىلعا دەگەن ورتاق ۇمتىلىسقا نەگىزدەلگەن بەرىك بايلانىس ورناتتى. بۇگىن بىزدە وسى مىقتى ىرگەتاسقا سۇيەنە وتىرىپ، اناعۇرلىم ستراتەگيالىق ءارى ناقتى ناتيجەگە باعىتتالعان ارىپتەستىككە قادام باسۋعا تاماشا مۇمكىندىك بار، - دەدى مارتەبەلى مەيمان.
ومان سۇلتانىنىڭ ايتۋىنشا، جوعارى دەڭگەيدەگى ءوزارا ساپارلار، ومان-قازاقستان بىرلەسكەن كوميسسياسىنىڭ جۇمىسى جانە 2025-2026-جىلدارعا ارنالعان «جول كارتاسىن» جۇزەگە اسىرۋ ىنتىماقتاستىقتىڭ اۋقىمدى سالالارىن ىلگەرىلەتۋ ءۇشىن سەنىمدى نەگىز قالادى.
- العا ىلگەرىلەۋ بارىسىندا ەكونوميكالىق جانە ينۆەستيتسيالىق ىنتىماقتاستىق وسى جاڭا كەزەڭنىڭ باستى ايقىنداۋشى ەرەكشەلىگى بولىپ قالۋى ءتيىس. بۇل بايلانىستاردى نىعايتۋ ارقىلى ءبىز ءوزارا تيىمدىلىك پەن ۇزاقمەرزىمدى سەرىكتەستىك ءۇشىن جاڭا مۇمكىندىكتەرگە جول اشا الامىز. ومان قازاقستانمەن كوپتەگەن سالادا اۋقىمدى ينۆەستيتسيالىق جانە سەرىكتەستىك مۇمكىندىكتەرىن كورىپ وتىر. ونىڭ ىشىندە ەنەرگەتيكا جانە تاۋ-كەن ونەركاسىبى، اۋىل شارۋاشىلىعى مەن ازىق-تۇلىك قاۋىپسىزدىگى، كولىك جانە لوگيستيكا، قارجىلىق قىزمەتتەر، تۋريزم، تەحنولوگيالار جانە جاساندى ينتەللەكت سالالارى بار. ءبىز مەملەكەتتىك ينۆەستيتسيالىق قورلارىمىزدى، جەكە سەكتوردى جانە بەيىندى مەملەكەتتىك قۇرىلىمدارىمىزدى بىرىكتىرەتىن بىرلەسكەن جوبالاردى دامىتۋدى قۇپتايمىز، - دەدى ول.
مارتەبەلى مەيمان قازاقستان ازيا مەن ەۋروپانى جالعايتىن جاھاندىق ساۋدا دالىزدەرىنىڭ بويىندا ستراتەگيالىق گەوگرافيالىق ورىنعا يە ەكەنىن، ال ومان پارسى شىعاناعى، ءۇندى مۇحيتى، ازيا جانە افريكا ايماعىنداعى نەگىزگى نارىقتارعا تىكەلەي تەڭىز قاتىناسىن قامتاماسىز ەتەتىنىن ايتتى.
- وسى ءبىر-ءبىرىن تولىقتىراتىن ارتىقشىلىقتاردى پايدالانۋ ەكى ەل ءۇشىن دە ەكونوميكالىق وسىمگە جول اشىپ، قوسىمشا زور قۇندىلىق قالىپتاستىرۋعا مۇمكىندىك بەرەدى. سوندىقتان ءبىز كولىك جانە لوگيستيكا سالاسىنداعى، سونىڭ ىشىندە ومان پورتتارى ارقىلى ساۋدا دالىزدەرىن قۇرۋ، سونداي-اق ەكى ەل اراسىنداعى اۋە قاتىناسىن كەڭەيتۋ بويىنشا ىنتىماقتاستىقتى ىلگەرىلەتۋگە نيەتتىمىز. بولاشاققا كوز جۇگىرتسەك، قارجى سەكتورى دا ارىپتەستىكتى تەرەڭدەتۋ ءۇشىن زور الەۋەتكە يە. وماندا «ومان حالىقارالىق قارجى ورتالىعى» قۇرىلىپ جاتقان تۇستا، ءبىز تاجىريبە الماسۋ جانە ينستيتۋتسيونالدىق سەرىكتەستىكتى دامىتۋ ءۇشىن مول مۇمكىندىكتەردى كورىپ وتىرمىز. ءدال سول سياقتى، قازاقستاننىڭ سيفرلىق ترانسفورماتسيا جانە جاساندى ينتەللەكت سالاسىنداعى جەتىستىكتەرى بولاشاق ىنتىماقتاستىعىمىزدىڭ ماڭىزدى وزەگى بولا الادى، - دەدى حايسام بەن تاريق ءال سايد.
بۇعان دەيىن پرەزيدەنت قاسىم-جومارت توقايەۆ پەن ومان سۇلتانى حايسام بەن تاريق ءال سايد شاعىن قۇرامدا كەلىسسوز جۇرگىزدى.