پرەزيدەنت ومان سۇلتانىنىڭ ساپارى تاريحي سيپاتقا يە ەكەنىن تىلگە تيەك ەتىپ، ونىڭ ەكىجاقتى بايلانىستارعا شىن مانىندە سەرپىن بەرەتىنىن ايتتى.
- ومان - قازاقستاننىڭ اراب الەمىندەگى ستراتەگيالىق تۇرعىدان ماڭىزدى ءارى ۋاقىت تەزىنەن وتكەن سەنىمدى سەرىكتەسى. ىنتىماقتاستىعىمىز وتىز جىلدان بەرى ءوزارا سەنىم، تۇسىنىستىك پەن قولداۋ رۋحىندا ءوربىپ كەلەدى. بۇگىن سىزبەن استانا تورىندە جۇزدەسىپ، قارىم-قاتىناسىمىزدى ەلەۋلى تاريحي دەڭگەيگە كوتەرگەلى جاتىرمىز. بۇل - ومان سۇلتانىنىڭ قازاقستانعا جانە ورتالىق ازياعا جاساعان العاشقى مەملەكەتتىك ساپارى. سوندىقتان مۇنى ەلىمىزگە كورسەتكەن ەرەكشە سىي-قۇرمەتىڭىز، سونداي- اق قوس تاراپتىڭ ساۋدا-ساتتىق پەن ءوزارا مۇددەگە ساي كەلەتىن بارلىق سالادا ىنتىماقتاستىقتى نىعايتۋعا نيەتتى ەكەنىن بىلدىرەتىن نىشان دەپ بىلەمىن. ءداستۇرلى مۇناي مەن گاز سەكتورىن نەمەسە كولىك، لوگيستيكا، سيفرلاندىرۋ، جاساندى ينتەللەكت سياقتى جاڭا باعىتتاردى، سونىمەن قاتار ساۋدا بايلانىستارى مەن اۋىل شارۋاشىلىعى ونىمدەرىن جولعا قويۋ مۇمكىندىكتەرى جونىندە ءوزارا اقپارات الماسۋدى وسىنداي ماڭىزدى سالالاردىڭ قاتارىنا جاتقىزۋعا بولادى. ومان سياقتى ستراتەگيالىق سەرىكتەسىمىز بولعانىنا قۋانامىز. ءبىز دە ەلىڭىزدىڭ سەنىمدى ارىپتەسى بولۋعا بارىنشا كۇش سالامىز، - دەدى قاسىم-جومارت توقايەۆ.
مەملەكەت باسشىسى ەكىجاقتى قارىم-قاتىناستى نىعايتۋعا سۇلتان حايسام بەن تاريق ءال ءسايدتىڭ ءاردايىم ىقىلاستى ەكەنىن اتاپ ءوتتى.
- اسا مارتەبەلى سۇلتان، ءسىز ايتۋلى مەملەكەت قايراتكەرىسىز. ەل باسقارۋ ىسىندەگى كورەگەن ۇستانىمىڭىز بەن ۇزاق جىلداردان بەرى حالقىڭىزعا جاساپ كەلە جاتقان قالتقىسىز قىزمەتىڭىز زور قۇرمەتكە لايىق. قازاقستان حالقى ءسىزدى ەرەكشە قادىرلەيدى، سونىمەن قاتار وماندى سەرىكتەس قانا ەمەس، دوستاس ءارى باۋىرلاس ەل دەپ اتاي الاتىنىن ماقتان تۇتادى. سىزدەر ستراتەگيالىق ماقسات قويۋ ارقىلى مەملەكەتتى گۇلدەندىرىپ، دامۋدىڭ داڭعىل جولىنا تۇسىرۋگە بولاتىنىن دالەلدەدىڭىزدەر. ونى ادام كاپيتالىنا ينۆەستيتسيا قۇيۋ، يننوۆاتسيالاردى يگەرۋ جانە كەلەشەككە باعدارلانعان ەكونوميكا قۇرۋ قادامدارىنان بايقاۋعا بولادى. Oman Vision 2040 باعدارلاماسى ۇلتتىق بولمىس-ءبىتىمدى، ەلدىڭ قۇندىلىقتارى مەن داستۇرلەرىن ساقتاي وتىرىپ، ءارتاراپتاندىرىلعان، باسەكەگە قابىلەتتى جانە ورنىقتى ەكونوميكا قالىپتاستىرۋ جولىنداعى ستراتەگيالىق باعدارىڭىزدىڭ دۇرىس ەكەنىن كورسەتەدى. كوشەلى كوشباسشى، بەيبىتشىلىك ساقشىسى ءارى پاراساتتى تۇلعا رەتىندە ءسىز دۇنيە جۇزىندەگى كوپتەگەن جاندى، تانىمال ساياساتكەرلەردى ءتانتى ەتىپ كەلەسىز، - دەدى قاسىم-جومارت توقايەۆ.
پرەزيدەنت وماننىڭ ايماقتاعى تۇراقتىلىقتى نىعايتۋ، ءدىنارالىق ديالوگتى ءوربىتۋ جانە گۋمانيتارلىق باستامالاردى ىسكە اسىرۋ ىسىندەگى رولىنە توقتالدى.
- ءتۇرلى تاراپتار اراسىنا دانەكەر بولىپ، ءوزارا تۇسىنىسۋىنە تالاي مارتە ىقپال ەتتىڭىز. وسى العىرلىعىڭىز وماندى وڭىرلىك جانە حالىقارالىق قاتىناستاردا سالماعى بار ەلگە اينالدىردى. ءبىز بۇل ۇستانىمدى جوعارى باعالايمىز. ەلىڭىز شىن مانىندە ءادىل ءارى ەشكىمگە بۇرا تارتپايتىن بەيتاراپ مامىلەگەر سانالادى. ءسىزدىڭ تاريحي ساپارىڭىز قازاقستان مەن ومان اراسىنداعى ەكىجاقتى قاتىناستار جىلناماسىندا ماڭىزدى كەزەڭ رەتىندە جازىلادى. اسا مارتەبەلى سۇلتان، حالىقتارىمىز اراسىنداعى دوستىقتى نىعايتۋعا قوسقان ولشەۋسىز ۇلەسىڭىزدى ەسكەرىپ، سىزگە «التىن قىران» وردەنىن تابىستاۋ - مەن ءۇشىن زور مارتەبە، - دەدى مەملەكەت باسشىسى.
بۇعان دەيىن اقوردا قازاقستان رەسپۋبليكاسى مەن ومان سۇلتاندىعى اراسىنداعى بىرلەسكەن مالىمدەمەنى جاريالادى.