قاسىم-جومارت توقايەۆ كورپوراتسيانىڭ الماتىدا ءبىلىم بەرۋگە جانە قىزمەت كورسەتۋگە ارنالعان روبوتتى تەحنيكالار شىعاراتىن زاۋىت اشۋ جوسپارىنا قولداۋ ءبىلدىردى.
پرەزيدەنت ەلىمىز اتالعان كومپانيانىڭ قىتايدان تىسقارى جەردەگى العاشقى ءوندىرىس الاڭى بولاتىنىن ايتتى. بۇل جوبا بيىل شىلدە ايىندا شاڭحايدا قول جەتكىزىلگەن ۋاعدالاستىققا ساي ىسكە اسىرىلىپ جاتىر.
كەزدەسۋدە ءبىلىم سالاسىنداعى سەرىكتەستىك پەرسپەكتيۆاسى تالقىلاندى. اتاپ ايتقاندا، UBTECH پەن قازاقستاننىڭ تەحنيكالىق جوعارى وقۋ ورىندارى جانە كوللەدجدەرى اراسىندا جۇيەلى ىقپالداستىق ورناتۋ مۇمكىندىگى قارالدى.
بۇدان بولەك، بىرلەسكەن قۇزىرەت ورتالىعىن قۇرۋ ۇسىنىلدى. وسى باستاما اياسىندا قازاقستاندىق ماماندار كومپانيانىڭ زەرتتەۋ جانە ءونىم ازىرلەۋ قىزمەتىنە قاتىسا الادى.
سونىمەن قاتار UBTECH تەحنولوگيالارىن Alatau City جوباسىنا جان-جاقتى ەنگىزۋ، تاۋ-كەن، مۇناي-گاز سالالارىندا جانە ءىرى لوگيستيكالىق نىسانداردا روبوتتى تەحنيكالاردى پايدالانۋ ماسەلەلەرى قاراستىرىلدى.
چجۋن يۋن سيفرلاندىرۋ جانە جاساندى ينتەللەكت سالالارىنا ەرەكشە كوڭىل بولگەنى ءۇشىن مەملەكەت باسشىسىنا العىس ايتتى. بۇل باعىتتاردا قازاقستان ەلەۋلى تابىسقا قول جەتكىزگەنىن اتاپ ءوتتى.
سونداي-اق UBTECH وكىلى ەلىمىزدە اشىق، ينكليۋزيۆتى ءارى ناقتى ناتيجەگە باعدارلانعان دامۋ ورتاسى قالىپتاسقانىن جوعارى باعالادى. ونىڭ پىكىرىنشە، بىرلەسكەن جوبالاردى جۇزەگە اسىرۋ ىنتىماقتاستىق اياسىن كەڭەيتۋگە جانە سيفرلىق تەحنولوگيالاردى ەنگىزۋگە تىڭ سەرپىن بەرەدى.
بۇعان دەيىن قاسىم-جومارت توقايەۆ YTO Express اتقارۋشى ديرەكتورى جوۋ سزيان مەن Pinduoduo كومپانياسىنىڭ حالىقارالىق بيزنەس جونىندەگى جەتەكشىسى ۆەن پەيچەندى قابىلداعانىن جازعان ەدىك.