توقايەۆ توعىز ەلدىڭ جاڭا ەلشىسىنە قازاقستاننىڭ بەيبىت ساياسات ۇستانىمىن تانىستىردى

سەنىم گراموتالارىن مولدوۆا رەسپۋبليكاسىنىڭ ەلشىسى يگور مولدوۆان، ۆەتنام سوتسياليستىك رەسپۋبليكاسىنىڭ ەلشىسى تحان لە نگۋەن، كورەيا رەسپۋبليكاسىنىڭ ەلشىسى كي حون جون، وڭتۇستىك افريكا رەسپۋبليكاسىنىڭ ەلشىسى لۋنگيساني دومينيك نتومبەللا، سلوۆاكيا رەسپۋبليكاسىنىڭ ەلشىسى ليۋبومير رەگاك، گەرمانيا فەدەراتيۆتىك رەسپۋبليكاسىنىڭ ەلشىسى حايكە رەناتە پايچ، ازەربايجان رەسپۋبليكاسىنىڭ ەلشىسى اليميرزامين اسكەروۆ، سلوۆەنيا رەسپۋبليكاسىنىڭ ەلشىسى برانكو راكوۆەتس جانە ناميبيا رەسپۋبليكاسىنىڭ ەلشىسى مونيكا نديلياۆيكە تاپسىردى.

مەملەكەت باسشىسى ەلىمىزدىڭ بەيبىتسۇيگىش سىرتقى ساياسات باعدارىن ۇستاناتىنىن ايتتى.

- وزدەرىڭىزگە ءمالىم، قازاقستان قازىرگىدەي اسا كۇردەلى گەوساياسي جاعدايدا بەيبىت سىرتقى ساياسات جۇرگىزىپ كەلەدى. ءبىز بەيبىتشىلىك سالتانات قۇرۋعا ءتيىس دەپ سانايمىز. سوندىقتان ورتالىق ازيادا دا، ودان تىسقارى جەرلەردە دە بەيبىتشىلىك پەن قاۋىپسىزدىكتى ساقتاپ، ىنتىماقتاستىقتى ءوربىتۋ ءۇشىن قولدان كەلگەن مۇمكىندىكتىڭ ءبارىن جاسايمىز، - دەدى پرەزيدەنت.

قاسىم- جومارت توقايەۆ سالتاناتتى راسىمگە قاتىسۋشىلارعا قازاقستاننىڭ ەكونوميكالىق الەۋەتى جانە ۇلتتىق ەكونوميكاعا شەتەلدەن ينۆەستيتسيا تارتۋ ىسىندەگى تابىستارى جونىندە مالىمەت بەردى.

- ءبىز ەلىمىزگە شەتەل ينۆەستيتسياسىن تارتۋ ءۇشىن بارىنشا قولايلى جاعداي جاساپ وتىرمىز. البەتتە، قازاقستانعا كەلىپ جۇمىس ىستەگىسى كەلەتىن شەتەلدىك كاسىپكەرلەردى جانە ءىرى كومپانيالاردى قۇشاق جايا قارسى الامىز. وزدەرىڭىز بىلەتىندەي، ءبىزدىڭ نارىقتا ءىرى حالىقارالىق كومپانيالاردىڭ باسىم بولىگى قىزمەت ەتەدى. بۇل ساياساتتان اينىمايتىنىمىزعا سەنىمدىمىن. شەتەلدىك ينۆەستيتسياعا قاتىستى اشىق ەسىك ساياساتىن دايەكتى تۇردە جالعاستىرۋعا نيەتتىمىز، - دەدى پرەزيدەنت.

بۇدان بولەك، مەملەكەت باسشىسى قازاقستاندا جۇرگىزىلىپ جاتقان اۋقىمدى ساياسي رەفورمالار جونىندە ايتتى. ونىڭ قيسىندى جالعاسى تاريحي قۇرىلتاي سايلاۋى بولماق.

قاسىم-جومارت توقايەۆ ەلىمىزدەگى تۇبەگەيلى وزگەرىستەر حالىقارالىق قوعامداستىقپەن ىنتىماقتاستىقتى نىعايتاتىن تىڭ مۇمكىندىكتەرگە جول اشاتىنىنا سەنىم ءبىلدىردى.

ءسوز سوڭىندا پرەزيدەنت استانانىڭ ەلشىلەر وكىلدىك ەتەتىن مەملەكەتتەرمەن قارىم-قاتىناستى نىعايتىپ، سان قىرلى ىقپالداستىقتى دامىتۋعا مۇددەلى ەكەنىن راستادى. سونداي-اق مەملەكەتتەر باسشىلارىنا جىلى لەبىزىن جولدادى.

وسىعان دەيىن مەملەكەت باسشىسى 2027-2029 -جىلدارعا ارنالعان بيۋدجەتتىڭ نەگىزگى باسىمدىقتارىن ايقىندادى.