پرەزيدەنت باستى ىقپالداستىق باعىتتارىنا توقتالدى. ەڭ اۋەلى، ت م د-نىڭ ۇزاقمەرزىمدى باسىمدىقتارىن بەلگىلەۋ قاجەت.
- تاۋەلسىز مەملەكەتتەر دوستاستىعىن دامىتۋ تۇجىرىمداماسى 2007 -جىلى بەكىتىلىپ، التى جىل بۇرىن جاڭارتىلعان ەدى. ودان كەيىن قابىلدانعان باعدارلامالار مەن قۇجاتتار كوبىنە بەلگىلى ءبىر سالاعا قاتىستى بولدى. سوندىقتان كوبىنە ءبىر- بىرىمەن سايكەسپەيدى. ولاردىڭ ءبارىن بىرىكتىرىپ، ءوزارا بايلانىستى ءبىرتۇتاس جۇيە تۇزگەن ءجون. كەلەشەكتە دوستاستىقتىڭ قانداي بولعانىن قالايمىز؟ ەۋرازياداعى گەوساياسي ارحيتەكتۋرا جىلدام وزگەرىپ جاتقان كەزەڭدە ونىڭ ورنى قانداي بولماق؟ ت م د-عا مۇشە مەملەكەتتەر وسى ساۋالداردىڭ ناقتى جاۋابىن تابۋىمىز قاجەت. سوندىقتان اتقارۋشى كوميتەتكە ەلدەرىمىزدىڭ ۇكىمەتتەرىمەن بىرلەسىپ، ت م د-نىڭ 2035 -جىلعا دەيىنگى دامۋ ستراتەگياسىن ازىرلەۋدى ۇسىنامىن. بۇل - ورتامەرزىمدى پەرسپەكتيۆا. ەڭ الدىمەن، مەملەكەتتەرىمىز ءۇشىن اسا ماڭىزدى باسىمدىقتارعا ءمان بەرگەن ءجون. ولار: ەكونوميكا، ەنەرگەتيكا، ينفراقۇرىلىم، وزىق تەحنولوگيالار جانە ادام كاپيتالى. مۇنداي ءتاسىل ورنىقتى پروگرەسكە جەتۋ جولىنداعى ءىس-ارەكەتىمىزدىڭ ۇيلەسىمدى ءارى ءبىرىزدى بولۋىنا سەپتىگىن تيگىزەدى، - دەدى پرەزيدەنت.
مەملەكەت باسشىسىنىڭ پىكىرىنشە، ەكونوميكالىق ىقپالداستىقتى تەرەڭدەتۋ جانە يندۋستريالىق- تەحنولوگيالىق سەرىكتەستىكتى جەتىلدىرۋ ەرەكشە ماڭىزعا يە. بۇل رەتتە ول قازاقستان ت م د ەلدەرىنىڭ نارىعىنا ادەتتەگىدەي باسىمدىق بەرەتىنىن ايتتى - ەلىمىزدىڭ سىرتقى ساۋدا اينالىمىنىڭ شيرەگىنەن استامى ۇيىمعا مۇشە مەملەكەتتەردىڭ ۇلەسىندە.
- وتكەن جىلدىڭ قورىتىندىسى بويىنشا ت م د ەلدەرىمەن ساۋدا اينالىمى 40 ميلليارد دوللارعا جۋىقتادى، ال بيىلعى جەتى ايدا 10 پايىزعا ءوستى. بىرلەسكەن وندىرىستەردى اشۋ ىسىندە دە ۇلكەن تاجىريبە قالىپتاستى. مىسالى، رەسەي فەدەراتسياسىنىڭ قاتىسۋىمەن ىسكە اسىرىلىپ جاتقان قازاقستاندىق ونەركاسىپ جوبالارى پورتفەلىندە جالپى قۇنى 61 ميلليارد دوللار بولاتىن 178 جوبا مەن باستاما بار، ونىڭ 124 ى جۇزەگە اسىرىلدى. وزبەكستانمەن ارادا قۇنى شامامەن 2 ميلليارد دوللار بولاتىن 80 جوبا بويىنشا جۇمىس جۇرگىزىلۋدە. بەلارۋسپەن ارنايى جانە اۋىل شارۋاشىلىعى تەحنيكاسىنىڭ بىرلەسكەن ءوندىرىسى جولعا قويىلدى، - دەدى قاسىم-جومارت توقايەۆ.