پرەزيدەنت تسيفرلاندىرۋ ءرولى ارتىپ، جاساندى ينتەللەكتىنى نەمەسە سۋپەرينتەللەكتىنى قولدانۋ اياسى كەڭەيىپ كەلە جاتقانىنا نازار اۋداردى.
ونىڭ پايىمداۋىنشا، جاڭا تەحنولوگيالاردى يگەرىپ، ءتول ازىرلەمەلەرىن ەنگىزۋ ت م د ەلدەرى ەكونوميكاسىنىڭ باسەكەگە قابىلەتىن ايقىندايتىن نەگىزگى فاكتور بولماق. بۇل رەتتە قاسىم-جومارت توقايەۆ جاساندى ينتەللەكت ستراتەگياسى، زاڭناما، مەملەكەتتىك قولداۋ شارالارى بويىنشا تاجىريبە الماساتىن تۇراقتى مەحانيزم قالىپتاستىرۋ باستاماسىن كوتەردى. وعان عىلىمي ورتالىقتار، ۋنيۆەرسيتەتتەر، كومپانيالار مەن ستارتاپتار قاتىسا الادى. سونداي-اق پرەزيدەنت كەلەسى جىلدىڭ العاشقى توقسانىندا استانادا جي سالاسى ماماندارىنىڭ ت م د اياسىنداعى ارنايى فورۋمىن وتكىزۋدى ۇسىندى.
مەملەكەت باسشىسى مادەني- گۋمانيتارلىق بايلانىستاردى كۇشەيتۋدىڭ ماڭىزىنا توقتالدى. ويتكەنى ادامدار اراسىنداعى تىعىز قارىم-قاتىناس، ءوزارا سەنىم، ۇقساس مەنتاليتەت، سونداي- اق ورىس ءتىلى ت م د-نىڭ بىرەگەي سيپاتىن پاش ەتەتىن ەرەكشەلىكتەر سانالادى.
- قازاقستاننىڭ ۇسىنىسىمەن ت م د مەملەكەتتەرى باسشىلارىنىڭ مادەنيەت سالاسىنداعى ىنتىماقتاستىقتى دامىتۋ تۋرالى مالىمدەمەسى قابىلداندى. تامىز ايىندا تۇڭعىش رەت استانادا ت م د ۆولونتەرلەر فورۋمى ءوتتى. وسى ارادا ۆولونتەرلىك ۇعىمى نەمەسە ىزگى ىستەر ساياساتى جاڭا كونستيتۋتسيامىزدا كورىنىس تاپقانىن اتاپ وتكىم كەلەدى. ياعني ۆولونتەرلەر كونستيتۋتسيالىق مارتەبەگە يە بولدى، سوعان سايكەس ولاردىڭ قىزمەتىنە ەرەكشە قامقورلىق كورسەتىلەدى. باستامالارىمىزعا ءاردايىم قولداۋ بىلدىرەتىن ارىپتەستەرىمە جانە ت م د ەلدەرى ۇكىمەتتەرىنىڭ باسشىلارىنا العىس ايتامىن. ەلدەرىمىز اراسىنداعى قارىم-قاتىناستا ورىس ءتىلىنىڭ اتقاراتىن ءرولىن اتاپ وتكەن ماڭىزدى. ورىس ءتىلى ءوزارا تۇسىنىسۋگە، ءبىلىم بەرۋ، عىلىم سالالارىنداعى سەرىكتەستىك پەن ادامدار اراسىنداعى بايلانىستىڭ كەڭەيۋىنە ىقپال ەتۋدە. بۇل ايدان انىق دۇنيە. سوندىقتان قادىرلى ارىپتەستەرىمدى حالىقارالىق ورىس ءتىلى ۇيىمىنىڭ قىزمەتىن قولداۋعا شاقىرامىن. دۇنيە جۇزىندە ورىس ءتىلىن ءار ءتۇرلى دەڭگەيدە مەڭگەرگەن 300 ميلليونعا جۋىق حالىق بار. سوندىقتان اتالعان ۇيىمنىڭ كەلەشەگى جارقىن. مەن بۇعان سەنىمدىمىن. سونىمەن قاتار ت م د ەلدەرىنىڭ تىلدەرى مەن مادەني ءارالۋاندىعىن كوزدىڭ قاراشىعىنداي ساقتاپ، بۇكىل حالىقتىڭ تاريحىنا، ءداستۇرى مەن مادەنيەتىنە قۇرمەتپەن قاراۋ اسا ماڭىزدى. بىزگە حالىقتارىمىزدىڭ دوستىعىنا ارقاۋ بولاتىن جاڭا ىنتىماقتاستىق جولدارىن ىزدەۋ قاجەت. جاستاردىڭ وقۋعا قۇشتارلىعىنا قولداۋ ءبىلدىرۋ وتە وزەكتى. سەبەبى ارتىق ءبىلىم - كىتاپتا. كىتاپ وقىعان ادام عانا ءبىلىمدى، پاراساتتى تۇلعا بولىپ قالىپتاسىپ، ومىردەن ءوز ورنىن تابادى. ينتەرنەت ۇستەمدىك قۇرعان، TikTok-مەنتاليتەتى سەكىلدى قۇبىلىس پايدا بولىپ، جاستاردىڭ مىنەز-قۇلقى وزگەرگەن زاماندا بۇعان ءمان بەرمەسە بولمايدى. قازاقستاندا ۇلتتىق كىتاپ كۇنى بەلگىلەندى. «ۇلت وقيتىن 100 كىتاپ» جوباسى ىسكە اسىرىلىپ جاتىر. وسى يدەيانى ءارى قاراي ءوربىتىپ، حالىقتارىمىزدىڭ ادەبي جاۋھارلارىنان قۇرالعان «ت م د كىتاپحاناسىنىڭ التىن قورىن» جاساۋدى ۇسىنامىن. اتالعان قوردى قۇرىلىسى كەلەسى جىلدىڭ ورتا شەنىندە اياقتالاتىن استاناداعى پرەزيدەنت كىتاپحاناسىندا ورنالاستىرۋعا بولار ەدى. جوبا اياسىندا كاسىبي اۋدارمانى دا قامتىپ، كوپشىلىك ەركىن پايدالاناتىن تسيفرلىق كىتاپحانا جاساقتاۋعا بولادى. ۇزدىك ادەبي شىعارمالاردى ناسيحاتتاۋ ارقىلى دوستاستىق حالىقتارىنىڭ تاريحىن، مادەنيەتىن جانە رۋحاني مۇراسىن زەردەلەۋ مۇمكىندىگى جاستارىمىزدىڭ ءوزارا تۇسىنىستىگىنە جول اشاتىنى، ەڭ باستىسى، قازىرگى قۇبىلمالى زاماندا ىنتىماعىمىزدى نىعايتا تۇسەتىنى ءسوزسىز، - دەدى قاسىم-جومارت توقايەۆ.