پرەزيدەنت كوزى اشىق، كوكىرەگى وياۋ، تاربيەلى، زاڭعا باعىناتىن ادال ازاماتتار ەڭ الدىمەن مەكتەپتەگى مۇعالىمنەن ءتالىم الاتىنى ايتتى.
سونىمەن قاتار مەملەكەت باسشىسى ەڭبەكقور، بىلىمگە قۇشتار، ىزدەنىمپاز ۇرپاق تاربيەلەۋدىڭ ماڭىزىنا توقتالدى.
- ءبىز بالالاردىڭ قىزىعۋشىلىقتارى مەن قاجەتتىلىكتەرىن ەسكەرۋگە، ولاردى شىنايى ومىردە دە، ۆيرتۋالدى كەڭىستىكتە دە قورعاۋعا مىندەتتىمىز. ەڭ باستىسى - وسكەلەڭ ۇرپاققا اسا قاجەتتى دۇنيەمەن، اتاپ ايتقاندا، جارقىن كەلەشەكپەن، ناقتى مۇمكىندىكتەرمەن قامتاماسىز ەتىپ، ولارعا ەسەيگەندە ماقسات-مۇراتىنا جەتۋگە ىنتالاندىراتىنداي جاعداي جاساۋ. ەڭبەكسىز ەشقانداي تابىس تا، جەتىستىك تە بولمايدى. بۇل - ءومىردىڭ قاعيداسى، زاڭى. ەڭبەك دەگەنىمىز - بۇكىل ءومىردى بيلەپ تۇرعان پاتشا، بۇل - ءومىردىڭ ارقاۋى. ءومىر، بۇل - عاجاپقا تولى سيقىرلى الەم ەمەس. ءومىر جولىن تەك جان-جاقتى دايىندالعان، بىلىممەن قارۋلانعان ادام عانا ەڭسەرە الادى. وسى قاراپايىم تۇسىنىكتى بالالارعا ءتۇسىندىرىپ ايتۋ ماڭىزدى. ستراتەگيالىق ماقساتىمىز - بيىك شىڭدارعا كوز تىگەتىن، باسەكەدەن تايسالمايتىن جاسامپاز ۇرپاق تاربيەلەۋ. قازاقستاننىڭ ءوسىپ-وركەندەۋى ءارقايسىمىزدىڭ قانشالىقتى ۇلەس قوساتىنىمىزعا بايلانىستى، - دەدى قاسىم-جومارت توقايەۆ.
پرەزيدەنت ءسوزىن تۇيىندەي كەلە، قازىر حالقىمىزدىڭ دۇنيەتانىمى وزگەرىپ، قوعامىمىزدا جاڭا ەتيكا قالىپتاسىپ كەلە جاتقانىنا نازار اۋداردى.
- تازالىق، ەڭبەكقورلىق، ادالدىق، ءوزارا سىيلاستىق قاسيەتتەرى ۇلتتىق داعدىمىزعا اينالىپ جاتىر. «تازا قازاقستان» اكسياسى جالپىۇلتتىق سيپات الىپ، ەلىمىزدىڭ كەلبەتىنە جانە ەڭ باستىسى، ازاماتتارىمىزدىڭ بولمىسىنا وڭ اسەر ەتە باستادى. تابيعاتتى ايالاۋ، جوعارى ەكولوگيالىق مادەنيەتتى قالىپتاستىرۋ مەملەكەتىمىزدىڭ كونستيتۋتسيالىق مىندەتى سانالادى. وسىنداي ەلدىك ماڭىزى زور ىسكە سىزدەر، جالپى ۇستازدار قاۋىمى مول ۇلەس قوسىپ جاتسىزدار. سەبەبى كوزى اشىق، كوكىرەگى وياۋ، تاربيەلى، زاڭعا باعىناتىن ادال ازاماتتار ەڭ الدىمەن مەكتەپتەگى مۇعالىمنەن ءتالىم الادى. سوندىقتان مەن ەلىمىزدەگى بارشا ۇستازعا شىنايى ريزاشىلىعىمدى بىلدىرەمىن. ۇستازدىق ەتكەن ءار ادامنىڭ ەرەن ەڭبەگى زور قۇرمەتكە لايىق دەپ سانايمىن، - دەدى مەملەكەت باسشىسى.
ايتا كەتەلىك مەملەكەت باسشىسى مۇعالىمدەردى كاسىبي مەرەكەسىمەن قۇتتىقتادى.