- سونداي-اق ساراپشىلار مەن مامانداردىڭ پىكىرىنە سۇيەنسەك، ۇلتتىق ءتۇرلى-ءتۇستى جانە سيرەك كەزدەسەتىن مەتالداردىڭ قورىن قالىپتاستىرۋ قاجەتتىلىگى پايدا بولىپ جاتىر. تۇپكى ماقسات - ەلىمىزدى جاھاندىق ءوندىرىس تىزبەگىنە قوسۋ. ەكسپورتتىق ساياساتىمىز دا وسى ماقساتقا ساي جۇرگىزىلۋى كەرەك. ۇكىمەت بۇل سالاداعى دامىعان ەلدەرمەن ستراتەگيالىق سەرىكتەستىك ورناتۋعا ءتيىس، - دەدى قاسىم-جومارت توقايەۆ.
پرەزيدەنتتىڭ ايتۋىنشا، جاڭادان اشىلعان كاسىپورىندار جۇمىس ىستەپ تۇرعان جەرگىلىكتى بيزنەس نىساندارىنا ورىنسىز كەدەرگى كەلتىرمەۋى كەرەك. ينۆەستورلاردى تارتقان كەزدە دە وسى ماسەلەگە ءمان بەرىپ، ءار ايماقتى، ءار سالانى مۇقيات زەردەلەگەن ءجون.
- قاتە شەشىمدەردىڭ سالدارى قانداي تەرىس ناتيجەلەرگە اكەپ سوقتىرعانىن كورىپ وتىرمىز. ماسەلەن، ەلىمىزدە مەتال وندىرەتىن Qarmet دەگەن ءىرى كاسىپورىن بار. سوعان قاراماستان، تاعى ءۇش وبلىستا ءدال وسىنداي ءوندىرىس ورىندارىن اشۋ جوسپارلانعان. وسى كاسىپورىنداردىڭ ءونىمى نارىقتىڭ سۇرانىسىنا يە بولا ما؟ بۇل سۇراققا ناقتى جاۋاپ جوق سياقتى. سوندىقتان وسىنداي ۇيلەسىمسىز شەشىمدەردىڭ پايداسى كۇماندى ەكەنىنە داۋ جوق. مەكەمەارالىق بايلانىستى نىعايتپاساق، ەكونوميكامىز ءوز الەۋەتىن جوعالتىپ الادى. ءاربىر ايماق ءوزىنىڭ باسىمدىقتارىن ايقىنداپ، سوعان ساي جۇمىس ىستەۋى كەرەك، - دەدى مەملەكەت باسشىسى.
قاسىم-جومارت توقايەۆتىڭ سوزىنە قاراعاندا، وسى ماسەلە بويىنشا ۇكىمەتتىڭ ۇيلەستىرۋ ءرولىن الدەقايدا كۇشەيتۋ قاجەت ەكەنى انىق. ءبىراق ايماقتار جەكەلەگەن سالاعا نەمەسە كاسىپورىنعا تاۋەلدى بولىپ قالماۋعا ءتيىس. سوندىقتان وڭىردە نەگىزگى سالانى دامىتا وتىرىپ، ونىڭ اينالاسىندا جانە ىشىندە دە تولىققاندى ءبىرتۇتاس جۇيە قۇرۋ ماڭىزدى.
- اتاپ ايتقاندا، ءبىلىم بەرۋ، قولدانبالى عىلىم، لوگيستيكا، قىزمەت كورسەتۋ سالالارىن، ساباقتاس وندىرىستەردى جانە تەحنولوگيالىق كاسىپكەرلىكتى دامىتقان ءجون. «حالىقتىق قۇرىلىس» ءار ايماقتا وسىنداي جۇيە، ياعني قازىرگى تىلمەن ايتساق، ەكوجۇيە قۇرۋعا وڭ ىقپال ەتەتىنىنە سەنىم بار، - دەدى پرەزيدەنت.
توقايەۆ قازاقستاننىڭ ترانزيتتىك الەۋەتىن سىنعا الدى
زاماناۋي جولدار مەن جول بويىنداعى ساپالى قىزمەت كورسەتۋ ينفراقۇرىلىمى بولماسا، قازاقستان حالىقارالىق ترانزيت ءدالىزى نەمەسە ەۋرازياداعى كولىك- لوگيستيكا ورتالىعى بولا المايدى.
پرەزيدەنت ماسەلەنىڭ ماڭىزى زور ەكەنىن، ونى قالاي بولعاندا دا شەشۋ قاجەتتىگىن باسا ايتتى.
- ەگەر شەكارا بىرنەشە شاقىرىمعا سوزىلعان كولىك كەپتەلىسىن تۋدىراتىن «تار وتكەلگە» اينالسا، ال قازىرگى جاعداي وسىنداي بولسا، وندا قازاقستاننىڭ وڭىردەگى كوشباسشىلىعى تۋرالى ءسوز قوزعاۋدىڭ ءوزى ارتىق، - دەپ سىنعا الدى پرەزيدەنت.
مەملەكەت باسشىسىنىڭ ايتۋىنشا، ەۋروپا مەن ازيانى جالعايتىن نەگىزگى اۋە دالىزدەرى ەلىمىزدىڭ اۋماعى ارقىلى وتەدى. بۇل - ەلىمىزگە ۇلكەن باسەكەلىك ارتىقشىلىق بەرەتىن مۇمكىندىك.
- الايدا ازىرگە بۇل ادەمى پرەزەنتاتسيالاردا قالىپ وتىر. وسى مۇمكىندىكتى ءىس جۇزىندە پايدالانۋ ءۇشىن جەرۇستى سەرۆيستىك ينفراقۇرىلىمىن دامىتۋ قاجەت. بۇل - الەمدىك تاجىريبەدە قالىپتاسقان ءتاسىل. ال قازىر قوماقتى تابىس كوزدەرى ەلىمىزدى اينالىپ وتۋدە، - دەدى ول.
توقايەۆ «Air Cargo» جەكە كومپانياسىنا ۇلكەن ءۇمىت ارتىلعانىن اتاپ ءوتتى.
- ونىڭ قارجىلىق مۇمكىندىگى مول، سونىڭ ىشىندە شەتەلدىڭ جەتەكشى ماماندارىنىڭ ەڭبەكاقىسىن تولەۋگە دە قاۋقارلى. سونداي- اق كومپانيا دەربەس شەشىم قابىلداي الادى. ءبىراق ءالى كۇنگە دەيىن ناقتى شەشىم دە، ناتيجە دە جوق. سىزدەرگە سەنىم ارتتىق. ەندى ناقتى ناتيجە كۇتەمىز، - دەدى پرەزيدەنت.
ايتا كەتەيىك، بيىلعى جولداۋ «جاڭا تاريحي كەزەڭدەگى قازاقستاننىڭ وزەكتى مىندەتتەرى» دەپ اتالادى.
بۇعان دەيىن پرەزيدەنت ۇلتتىق قوردىڭ ەڭ باستى ميسسياسىن اتاعان ەدى.