توقايەۆ: مەملەكەت قازىناسىنا اۋىز سالۋ - ەلگە جاسالعان ەڭ اۋىر قاستاندىق

استانا. KAZINFORM - مەملەكەت قازىناسىنا اۋىز سالۋ، كونستيتۋتسيانىڭ تالاپتارىن اياققا تاپتاۋ - ەلگە جاسالعان ەڭ اۋىر قاستاندىق. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲ فورۋمىندا مەملەكەت باسشىسى قاسىم-جومارت توقايەۆ ايتتى.

Фото: Ақорда

- كوپ ۇزاماي حالقىمىز ەل تاۋەلسىزدىگىنىڭ 35 جىلدىعىن اتاپ وتەدى. بۇل - مەملەكەتىمىزدىڭ تاريحي ءوسىپ-وركەندەۋ جولىنداعى اسا ماڭىزدى بەلەس. وسى كەزەڭدە ءبىز تالاي قيلى جولدان امان-ەسەن وتتىك. بەرەكەلى بىرلىگىمىزدىڭ ارقاسىندا كوپتەگەن سىناقتى ابىرويمەن ەڭسەردىك. مەملەكەتتىلىگىمىزدى نىعايتتىق، حالىقارالىق ابىروي-بەدەلىمىزدى كۇشەيتتىك. ءبىز قازاقستاندى باسەكەگە قابىلەتتى، وزىق ەل رەتىندە دامىتۋ ءۇشىن ءالى دە بەلسەندى ءارى تاباندى جۇمىس ىستەي بەرەمىز. ارينە، وسى كەزگە دەيىن ءبارىمىز جۇرت بولىپ جۇمىلىپ، ءبىراز شارۋا اتقاردىق. وسكەلەڭ ۇرپاق الدىنداعى جاۋاپكەرشىلىكتى تەرەڭ سەزىنە وتىرىپ، اۋقىمدى رەفورمالاردى جۇزەگە اسىردىق، - دەدى مەملەكەت باسشىسى.

پرەزيدەنت ناۋرىز ايىندا وتكەن جالپىۇلتتىق رەفەرەندۋمدا مەملەكەتىمىزدىڭ ءتول قۇجاتى - كونستيتۋتسيامىز قابىلدانعانىن اتاپ ءوتتى.

- بۇنى ۇلتىمىزدىڭ تاعدىرىنا تىكەلەي اسەر ەتەتىن تاريحي شەشىم بولدى دەسەك، ارتىق بولماس. كونستيتۋتسيادا ەگەمەندىك پەن تاۋەلسىزدىكتى قورعاۋ، جالپىۇلتتىق بىرلىگىمىزدى كۇشەيتۋ مەملەكەتتىلىگىمىزدىڭ نەگىزگى قاعيداتتارى بولىپ بەكىتىلدى. ادام كاپيتالىن، ءبىلىم-عىلىمدى، يننوۆاتسيانى دامىتۋ كونستيتۋتسيالىق مارتەبەگە يە بولعان مىندەتكە اينالدى. ءبىز ۇلت كونستيتۋتسياسىندا «زاڭ مەن ءتارتىپ» قاعيداتىن حالقىمىزدىڭ اسا ماڭىزدى قۇندىلىعى دەپ ايقىندادىق، - دەدى قاسىم-جومارت توقايەۆ.

مەملەكەت باسشىسى «زاڭ مەن ءتارتىپ» ادىلەتتى قازاقستاندى قۇرۋ جولىنداعى باستى ۇستانىمى ەكەنىن باسا ايتتى.

- تۇپتەپ كەلگەندە، اۋقىمدى ساياسي جانە الەۋمەتتىك- ەكونوميكالىق وزگەرىستەر ءدال وسى قاعيداتقا نەگىزدەلەدى. ويتكەنى زاڭ ۇستەمدىك ەتپەسە، قوعامدا ءتارتىپ بولماسا، ەشقانداي رەفورمانىڭ ناتيجە بەرمەسى ايدان انىق. مەملەكەت قازىناسىنا اۋىز سالۋ، كونستيتۋتسيانىڭ تالاپتارىن اياققا تاپتاۋ - ەلگە جاسالعان ەڭ اۋىر قاستاندىق. سوندىقتان ءبىز قوعامدىق دەرتتىڭ بارىنە، سونىڭ ىشىندە سىبايلاس جەمقورلىققا قارسى باتىل كۇرەس جۇرگىزەمىز، - دەدى پرەزيدەنت.