— قىمباتتى وتانداستار! وتباسى كۇنى قۇتتى بولسىن! وتباسى — ۇلتتىڭ بىرەگەي بولمىسىن ايقىندايتىن جانە مەملەكەت پەن قوعامنىڭ دامۋىنا تىكەلەي ىقپال ەتەتىن ايرىقشا ماڭىزدى ينستيتۋت. ءار ازاماتتىڭ دۇنيەتانىمى، ادامي قاسيەتتەرى قاستەرلى قارا شاڭىراعىندا قالىپتاسادى. انا جۇرەگىنىڭ جىلۋى مەن اكەنىڭ ءورىستى ونەگەسى ءار ادامدى بيىك ماقساتتارعا جەتەلەيدى. ۇلكەندەردىڭ دانالىعى مەن پاراسات-پايىمى جاستارعا ومىرلىك باعدار بولادى، جاناشىر جانداردىڭ قولداۋى ءاردايىم كۇش-قۋات بەرەدى. وسىلايشا، ءبىز سالت-ءداستۇرىمىز بەن ءتول قۇندىلىقتارىمىزدى ۇرپاقتان ۇرپاققا جەتكىزىپ، حالقىمىزدىڭ مادەني دىڭگەگىن جانە رۋحاني تۇتاستىعىن نىعايتىپ كەلەمىز، — دەدى ول.
پرەزيدەنت -1 -شىلدە كۇنى زاڭدى كۇشىنە ەنگەن قازاقستان رەسپۋبليكاسىنىڭ كونستيتۋتسياسىنا سايكەس نەكە جانە وتباسى، انا، اكە مەن بالا مەملەكەتتىڭ قورعاۋىندا بولاتىنىن ەسكە سالدى.
— كونستيتۋتسيادا بالالاردىڭ قۇقىعىن، ايەل مەن انانىڭ وتباسىنداعى ءرولىن كۇشەيتۋگە باسا نازار اۋدارىلدى. تۇڭعىش رەت «نەكە — ەر مەن ايەلدىڭ مەملەكەت زاڭعا سايكەس تىركەگەن ەرىكتى جانە تەڭ قۇقىقتى وداعى» دەگەن نورما كورىنىس تاپتى. سونداي-اق بيىل وتباسى ماسەلەلەرى جونىندەگى ۋاكىل ينستيتۋتى قۇرىلدى. بالا تاربيەسى ماسەلەسىنە زور جاۋاپكەرشىلىكپەن قاراۋ، وسكەلەڭ ۇرپاقتىڭ جان-جاقتى دامۋى ءۇشىن قولايلى جاعداي جاساۋ — مەملەكەتتىڭ ماڭىزدى ميسسياسىنىڭ ءبىرى. بۇل — ادام كاپيتالىن نىعايتۋدىڭ، ياعني ەلىمىزدىڭ الەۋەتىن ارتتىرۋدىڭ باستى شارتى. وتانعا دەگەن سۇيىسپەنشىلىك سەزىمى، سونداي-اق زاڭ مەن تارتىپكە باعىنۋدىڭ، تابيعاتتى ايالاۋدىڭ، قوعامدىق ورىنداردا تازالىقتى ساقتاۋدىڭ، جاس بۋىننىڭ بويىنا حالقىمىزدىڭ وزىق داستۇرلەرىن ءسىڭىرۋدىڭ ەرەكشە ءمان-ماڭىزى، ەڭ الدىمەن، وتباسىنداعى ءتالىم-تاربيە ارقىلى دارىپتەلەدى، — دەدى مەملەكەت باسشىسى.
قاسىم-جومارت توقايەۆ ءار شاڭىراعى باقىتتى ءومىر سۇرەتىن ادىلەتتى قازاقستاندى بىرگە قۇراتىنىمىزدى اتاپ ءوتتى.
— ءبارىمىز وسى ورتاق مىندەتكە كۇش جۇمىلدىرساق، قوعامدا وركەنيەتتى ەلدەرگە ءتان جاڭا ەتيكا قالىپتاستىرامىز. ءبىز جاسامپاز ۇلت رەتىندە تاريحي ورلەۋ داۋىرىنە سەنىممەن قادام باسىپ، ماقسات-مىندەتتەرىمىزگە قول جەتكىزەمىز. وسىلايشا، ءار شاڭىراعى باقىتتى ءومىر سۇرەتىن ادىلەتتى قازاقستاندى بىرگە قۇرامىز. مەن بۇعان كامىل سەنەمىن. بارشا قازاقستان ازاماتىنا زور دەنساۋلىق، تولايىم تابىس تىلەيمىن! — دەدى پرەزيدەنت.
ايتا كەتەيىك، قازاقستاندا 7-13 -قىركۇيەك ارالىعىندا وتەتىن وتباسى كۇنىنە ارنالعان اپتالىق باستالعانى حابارلاندى.